চৰকাৰৰ এক সিদ্ধান্তৰ পাছতে ৰাজ্যৰ কেইবাখনো হাস্পতালত হাহাকাৰ লাগিছে৷ ব্যক্তিগত হাস্পতালত আয়ুষ্মান কাৰ্ডৰ সেৱা বন্ধ কৰাত হাহাকাৰ লগা পৰিলক্ষিত হৈছে৷ পূৰ্ব জাননী অবিহনে হঠাতে আয়ুষ্মান কাৰ্ডৰ সেৱা বন্ধ কৰাত ব্যক্তিগত হাস্পতালসমূহত ৰোগী আৰু ৰোগীৰ পৰিয়ালৰ পানীত হাঁহ নচৰা অৱস্থা হৈছে৷ ২৩ জুলাইৰ পৰা ব্যক্তিগত হাস্পতালসমূহত আয়ুষ্মান কাৰ্ডৰ জৰিয়তে চিকিৎসা সেৱা লাভৰ যি সুবিধা আছিল সেয়া বন্ধ কৰা হৈছে৷ ফলত বহু ৰোগী আৰু ৰোগীৰ অভিভাৱক বিবুদ্ধিত পৰিছে।

অধিকাংশ ব্যক্তিগত হাস্পতালত আয়ুষ্মান কাৰ্ডৰ ব্যৱস্থা শ শ ৰোগী উপকৃত হৈছিল। কাৰ্ডৰ জৰিয়তে কৰ্কট, বৃক্ক আদিৰ ৰোগীসকলে ডায়েলাইছিছ কৰাইছিল। কিন্তু হঠাতে আয়ুষ্মান কাৰ্ডৰ সেৱা বন্ধ হোৱাত উজনি, নামনি আৰু বৰাকৰ ব্যক্তিগত হাস্পতালত ৰোগী আৰু ৰোগীৰ অভিভাৱকৰ মাজত তীব্ৰ প্ৰতিক্ৰিয়াৰ সৃষ্টি হৈছে।