পেহেলগামত সন্ত্ৰাসবাদীৰ নৃশংস আক্ৰমণৰ প্ৰতিশোধ স্বৰূপে মঙলবাৰে মাজনিশা ভাৰতীয় সেনাই ‘সেন্দূৰ’ অভিযানৰ জৰিয়তে পাকিস্তান আৰু পাক অধিকৃত কাশ্মীৰত সন্ত্ৰাসবাদীৰ ঘাটিত লক্ষ্য কৰি মিছাইল আক্ৰমণ চলায়। এই আক্ৰমণত জৈশ-ই-মহম্মদ (JEM)ৰ মুখ্য ঘাঁটি বাহাৱালপুৰৰ সৈতে জড়িত আছিল বুলি জানিব পৰা গৈছে। সূত্র অনুসৰি, এই অভিযানত জৈশ মুৰব্বী মৌলানা মাছুদ আজহাৰৰ পৰিয়ালৰ ১০ জন সদস্য আৰু ৪ জন ঘনিষ্ঠ সহযোগী নিহত হয়। আজহাৰৰ এক বিবৃতিত উল্লেখ কৰা অনুসৰি, নিহতসকলৰ ভিতৰত আছে তেওঁৰ জ্যেষ্ঠ ভগ্নী, ভগ্নীৰ স্বামী, দুজন ভতিজা আৰু তেওঁলোকৰ পাঁচ সন্তান নিহত হয়। লগতে, আজহাৰৰ এজন সহযোগী আৰু তেওঁৰ মাতৃসহ আন দুজন ঘনিষ্ঠ সদস্যো মৃত্যু বৰণ কৰে। এই আক্ৰমণৰ প্ৰতি প্ৰতিক্ৰিয়া ব্যক্ত কৰি আজহাৰে কয়, “বৰ্বৰতাৰ এই কাৰ্যই সকলো সীমা অতিক্ৰম কৰিছে। এতিয়া দয়াৰ কোনো আশা কৰা উচিত নহয়।” ১৯৯৯ চনৰ আই.চি.-৮১৪ বিমান অপহৰণ কাণ্ডৰ পিছত মুক্তিপ্ৰাপ্ত মাছুদ আজহাৰ বাহাৱালপুৰত জৈশ-ই-মহম্মদৰ মূখ্য ঘাটি গঢ়ি তোলে। ভাৰতত সংঘটিত কেইবাটাও বৃহৎ সন্ত্ৰাসবাদী আক্ৰমণ—২০০১ চনৰ সংসদ আক্ৰমণ, ২০০০ চনৰ জম্মু-কাশ্মীৰ বিধানসভা আক্ৰমণ, ২০১৬ চনৰ পাঠানকোট আৰু ২০১৯ চনৰ পুলৱামা আত্মঘাতী বিস্ফোৰণত তেওঁ আৰু তেওঁৰ সংগঠন জড়িত আছিল। ২০১৯ চনৰ মে’ মাহত ৰাষ্ট্ৰসংঘই মাছুদ আজহাৰক ‘বিশ্বত্ৰাস সন্ত্ৰাসবাদী’ হিচাপে ঘোষণা কৰে, যাৰ পূৰ্বে চীনে বহু বছৰ এই প্ৰস্তাৱ অবৰোধ কৰি ৰাখিছিল। ইফালে, পাকিস্তানৰ পঞ্জাৱ ৰাজ্যৰ তথ্য মন্ত্ৰী আজমা বোখাৰীয়ে জানিবলৈ দিয়ে যে বাহাৱালপুৰ আক্ৰমণত আহতসকলক ভিক্টোৰিয়া চিকিৎসালয়লৈ স্থানান্তৰিত কৰা হৈছে। আনহাতে, পাকিস্তানী সেনাৰ মতে এই আক্ৰমণত ২৬ জন লোক নিহত হোৱাৰ বিপৰীতে ৪৬ জন আহত হৈছে। ভাৰতৰ এই কঠোৰ প্ৰতিক্ৰিয়া সন্ত্ৰাসবাদৰ বিৰুদ্ধে এক স্পষ্ট বাৰ্তা বুলি বিশ্লেষকসকলে মন্তব্য কৰিছে। দেশৰ সকলো কোণত এই অভিযানক সমৰ্থন জনোৱা হৈছে।