পঞ্চায়ত নিৰ্বাচনৰ বিলম্বৰ বিৰুদ্ধে গুৱাহাটী উচ্চ ন্যায়ালয়ৰ দ্বাৰস্থ হ’ব বুলি অসম প্ৰদেশ কংগ্ৰেছৰ সভাপতি ভূপেন বৰাইয়ে ৰাজ্য চৰকাৰক স্পষ্ট হুংকাৰ দিছে। দিল্লীৰ পৰা উভতি আহি উজনি অসম ভ্ৰমণৰ সময়ত সাংবাদিকসকলক সন্মুখত কৰা মন্তব্যত তেওঁ কয়, “১৮ মাৰ্চৰ আগতে যদি পঞ্চায়ত নিৰ্বাচন নহয়, তেন্তে ২০ মাৰ্চত আমি আদালতক যাম। ইতিমধ্যে উচ্চ ন্যায়ালয়ৰ অধিবক্তাৰ সৈতে কথা হৈছে।”

উন্নয়নী তহবিল হেৰুৱাৰ আশংকা:
বৰাইয়ে অভিযোগ তুলি কয় যে ৰাজ্য চৰকাৰে নিৰ্বাচনৰ নামত ভেকোভাওনা কৰি কেন্দ্ৰীয় পুঁজিৰ পৰা ১১০০ কোটী টকা হেৰুৱাবলৈ ওলাইছে। তেওঁ কয়, “এই তহবিল নাথাকিলে অসমৰ গ্ৰাম্য উন্নয়নৰ কামবোৰ স্তব্ধ হ’ব। মুখ্যমন্ত্ৰী হিমন্ত বিশ্ব শৰ্মাই বিৰোধী শক্তিৰ শক্তিশালী সংগঠন দেখি ভয় খাইছে, সেয়েহে নিৰ্বাচন পলাইছে।”

মিত্ৰতা আৰু ৰাজনৈতিক সমালোচনা:
ৰাইজৰ দলৰ নেতা অখিল গগৈয়ে কংগ্ৰেছক বিশ্বাসঘাটক বুলি কোৱাৰ প্ৰতিবাদেৰে বৰাইয়ে কয়, “২০১১ চনত কংগ্ৰেছৰ ৭৪ বিধায়ক থাকোঁতেও বিপিএফৰ সৈতে মিত্ৰতা কৰা হৈছিল। মিত্ৰতাৰ ধৰ্ম আমি সদায় ৰক্ষা কৰিছোঁ।” তেওঁ লগতে কটাক্ষ কৰে, “মিত্ৰতা টিভি টক শ্ব’ৰ বিষয় নহয়। ইয়াৰ বাবে স্থানীয় স্তৰত বুথে বুথে বুজাবুজি হ’ব লাগিব। বিজেপি-অগপ যিদৰে ৰাজ্যত চৰকাৰ চলে, পঞ্চায়ত স্তৰত সেইটো সম্ভৱ নহয়।”

সাংস্কৃতিক ঐতিহ্যৰ উল্লেখ:
সমাজ বিজ্ঞানৰ পাঠ্যক্ৰমৰ প্ৰসংগত বৰাইয়ে অসমৰ সাংস্কৃতিক মহাপুৰুষসকলৰ দৃষ্টান্ত দি কয়, “শংকৰদেৱ, মাধৱদেৱ, লাচিত বৰফুকন, বা সাহিত্যিক লক্ষ্মীনাথ বেজবৰুৱাই আমাক ধৰ্ম-বৰ্ণৰ ভেদাভেদ শিকাই নগ’ল। কোনো হিন্দু শাস্ত্ৰতে আন ধৰ্মক ঘৃণা কৰিবলৈ নিশিকায়।”

নেতৃত্বৰ স্থিৰতা আৰু ভৱিষ্যতৰ আভাস:
প্ৰদেশ কংগ্ৰেছৰ সভাপতি পদত স্থিৰতাৰ কথা কৈ বৰাইয়ে কয় “বহাগ বিহুৰ আগতেই দললৈ ভাল খবৰ আহিব। বহু নেতাই আমাৰ দলত যোগ দিবলৈ ওলাইছে, কিন্তু সিহঁতৰ নাম সাঙুৰি নকওঁ—কাৰণ তেওঁলোকে অসুবিধাত পৰিব পাৰে।”