গুৱাহাটী প্ৰেছ ক্লাৱে কিয় ভাওনা পাতিব লাগে৷ ভাওনা ছেকুলাৰ নহয়৷ এনে মন্তব্য প্ৰদান কৰি বিতৰ্কত সোমাই পৰিছে মন্ত্ৰী তথা ঢেকিয়াজুলি সমষ্টিৰ বিধায়ক অশোক সিংহল৷ তাৰ লগতে সংবিধানৰ নামত শপত লোৱা জনপ্ৰতিনিধি হৈ এটা বিশেষ জনগোষ্ঠীৰ বিৰুদ্ধে ঘৃণাসূচক মন্তব্য প্ৰদান কৰি সংবিধানক উলংঘা কৰিছে৷ ৰাজহুৱা অনুষ্ঠানত মাইকৰ সন্মুখত মিঞা বুলি কৈ এটা জনগোষ্ঠীৰ বিৰুদ্ধে ঘৃণা বিয়পোৱা এইগৰাকী অশোক সিংহলেৰ বিৰুদ্ধে আজি অসম বিধানসভাৰ বাজেট অধিৱেশনত বিৰোধীয়ে আনিলে ভৰ্ৎসনা প্ৰস্তাৱ৷ কংগ্ৰেছ নেতা তথা বিৰোধী দলপতি দেৱব্ৰত শইকীয়াই মন্ত্ৰী অশএাক সিংহলৰ বিৰুদ্ধে ভৰ্ৎসনা প্ৰস্তাৱ উত্থাপন কৰে৷ বিধানসভাত উপাধ্যক্ষ প্ৰস্তাৱক লৈ জনাই যে মন্ত্ৰী অশোক সিংহলৰ বিৰুদ্ধে ভৰ্ৎসনা প্ৰস্তাৱ আনিছে বিৰোধী দলপতিয়ে৷ আমি প্ৰস্তাৱৰ প্ৰতিলিপি প্ৰেৰণ কৰিছো অশোক সিংহললৈ৷ সেই সময়ত শাসক পক্ষৰ তৰফৰ পৰা অশোক সিংহলক বচাবলৈ প্ৰয়াস কৰা দেখা যায়৷ শাসক পক্ষৰ বিধায়ক ৰূপজ্যোতি কুৰ্মীয়ে কয় উচ্চতম ন্যায়ালয়ে কৈছে যে মিঞা, পাকিস্তানী বুলি কোৱাটো অসাংবিধানিক নহয়৷ তেতিয়া উপাধ্যক্ষই শ্বেৰমান আলী আহমেদক প্ৰশ্ন কৰি কয় যে আপুনি মিঞা শব্দটো সদনত কোৱাটো সমৰ্থন কৰে নে৷ তেতিয়া অখিল গগৈয়ে আসনৰ পৰা থিয় হৈ উপাধ্যক্ষক উদ্দেশ্যে কয় যে আপুনি বিষয়টোৰ কমিউনিৱেল ব্যাখা নিদিব৷ আপুনি মাজে মাজে বাহিৰতো তেনে ব্যাখ্যা দি থাকে৷ মন্ত্ৰী বিমল বৰাই সদনৰ বাহিৰত সাংবাদিকক কয় যে এইটো ভুল বুজাবুজি হৈছে৷ আপোনালোকে মুখামুখিকৈ বহি আলোচনা কৰিলে বিষয়টো সমাধান হ’ব বুলি কয়৷ বিমল বৰাই কথাৰ পাকত তেনে কথা ক’ব পাৰে বুলি উল্লেক কৰি কয় যে যদি তেওঁ তেনে কথা কোৱা নাই তেন্তে তেওঁ দুখ পাব৷