ডিজিটেল ডেস্কঃ কলকাতাৰ আৰ জি কৰ মেডিকেল কলেজৰ এগৰাকী মহিলা চিকিৎসকৰ সৈতে সংঘটিত ধৰ্ষণ আৰু হত্যাকাণ্ডক লৈ পশ্চিম বংগৰ মুখ্যমন্ত্ৰী মমতা বেনাৰ্জীৰ বিৰুদ্ধে সৰৱ হৈ পৰিছে বিজেপি। কেন্দ্ৰীয় মন্ত্ৰী তথা বেগুচৰাইৰ সাংসদ গিৰিৰাজ সিঙে বংগৰ আইন-শৃংখলা পৰিস্থিতিৰ প্ৰতি লক্ষ্য ৰাখি মুখ্যমন্ত্ৰী মমতাৰ পদত্যাগ দাবী কৰিছে।

বিজেপিৰ ফায়াৰব্ৰেণ্ড নেতা হিচাপে পৰিচিত গিৰিৰাজ সিঙে পশ্চিম বংগৰ মুখ্যমন্ত্ৰী মমতা বেনাৰ্জীৰ সন্দৰ্ভত কয়, “এইটো অতি দুৰ্ভাগ্যজনক ঘটনা। বংগৰ আইন-শৃংখলা পৰিস্থিতি বৰ্তমান সময়ত অতি শোচনীয়। মমতা বেনাৰ্জীৰ শাসনত ৰাজ্যখনৰ আইন শৃংখলাৰ অৱনতি ঘটিছে। যদি তেওঁ এয়া চম্ভালিব নোৱাৰে, তেন্তে ব্যৰ্থতা স্বীকাৰ কৰি পদত্যাগ কৰা উচিত। যদি মমতা বেনাৰ্জীক ক্ষমতাৰ পৰা আঁতৰোৱা নহয়, তেন্তে বংগ এদিন বাংলাদেশ হৈ পৰিব।’’

ইফালে মহিলা চিকিৎসকৰ ধৰ্ষণ আৰু হত্যাকাণ্ডৰ বিৰুদ্ধে শুকুৰবাৰে মৌলালীৰ পৰা কলকাতাৰ ডৰিনা চাৰিআলিলৈ এক প্ৰতিবাদী সমদলৰ নেতৃত্ব দিয়ে মমতা বেনাৰ্জীয়ে। ভুক্তভোগীৰ পৰিয়ালক শীঘ্ৰে ন্যায় প্ৰদান কৰা হ’ব বুলিও আশ্বাস দিয়ে মুখ্যমন্ত্ৰীগৰাকীয়ে।