অসম আৰু গুজৰাটত স্থাপন হোৱা ছেমি কণ্ডাক্টৰ প্ৰকল্পৰ বিৰোধ কৰি শলঠেকত পৰিছে কংগ্ৰেছৰ নেতা৷ কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গেৰ পুত্ৰ প্ৰিংক খাৰ্গেয়ে এটা টুইট কৰি টাটাৰ ছেমি কণ্ডাক্টৰ আটাইবোৰ প্ৰকল্প বিজেপি শাসিত ৰাজ্যত স্থাপন হোৱাত তীব্ৰ বিৰোধ কৰি এক্সত এটা পোষ্ট কৰিছিল৷ তাৰ পাছতে অসমক অপমান কৰাৰ অভিযোগ আনি সৰৱ হৈছে বিজেপিৰ নেতাসকল৷ অসম বিজেপিৰ কেইবাজনো নেতাই মল্লিকাৰ্জুন খাৰ্গেৰ পুত্ৰ প্ৰিংক খাৰ্গেৰ মন্তব্যৰ বিৰোধ কৰি গৰহিণা দিছে৷ প্ৰিংক খাৰ্গেয়ে কৈছিল যে পাঁচটা ছেমিকন নিৰ্মাণ গোটৰ চাৰিটা গুজৰাটত আৰু এটা অসমত নিৰ্মাণ কৰা হৈছে৷ তাত দক্ষতাৰ পৰিৱেশ নাই। তাত গৱেষণাৰ পৰিৱেশ নাই। উদ্ভাৱনৰ পৰিৱেশ ব্যৱস্থা নাই৷ যেতিয়া চিপ ডিজাইনিং প্ৰতিভাৰ ৭০ শতাং কৰ্ণাটকত৷ মই বুজি নাপাওঁ কিয় চৰকাৰে ৰাজনৈতিক প্ৰভাৱ ব্যৱহাৰ কৰি আন এখন ৰাজ্যলৈ ঠেলি দিব বিচাৰে। সেয়া অনুচিত। মন্ত্ৰী অশোক সিংঘলে খাৰ্গেৰ এই মন্তব্যৰ বিৰোধ কৰি কয় যে অসমবাসী আৰু অসমৰ প্ৰতি কংগ্ৰেছৰ এনে তীব্ৰ ঘৃণা আৰু ঈৰ্ষা কিয়? জৱাহৰলাল নেহৰুৰ সময়ৰ পৰাই কংগ্ৰেছে অসম আৰু উত্তৰ-পূৰ্বাঞ্চলৰ প্ৰতি সতীয়া মাতৃৰ অৱহেলাৰ নীতি গ্ৰহণ কৰি আহিছে। আৰু এতিয়া শ্ৰদ্ধাৰ মুখ্যমন্ত্ৰী ড০ হিমন্ত বিশ্ব শৰ্মাদেৱৰ সবল নেতৃত্বত অসম বিকাশ আৰু উন্নয়নৰ পথত আগুৱাই গৈ থকাৰ বিষয় বা সত্যটো কংগ্ৰেছে মানি ল’বলৈ অপাৰগ হৈ অসমৰ জনসাধাৰণৰ দক্ষতা আৰু সম্ভাৱনাক অৱমাননা কৰিবলৈ বাৰম্বাৰ চেষ্টা কৰি আছে। মন্ত্ৰী পীয়ুষ হাজৰিকাই কংগ্ৰেছ নেতাৰ মন্তব্যক গৰিহণা দি কংগ্ৰেছক তীব্ৰ সমালোচনা কৰিছে৷ আনহাতে, কেন্দ্ৰীয় মন্ত্ৰী পৱিত্ৰ মাৰ্ঘেৰিটাই ছেমিকণ্ডাক্টৰ প্ৰকল্পৰ বিৰোধিতা কংগ্ৰেছে অসমবাসীক অপমান কৰা বুলি কয়৷ কংগ্ৰেছ দল, কংগ্ৰেছী নেতাক ধিক্কাৰ দি ছেমিকণ্ডাক্টৰ প্ৰকল্পৰ বিৰোধিতা কৰাসকলৰ বিৰুদ্ধে সৰৱ কেন্দ্ৰীয় মন্ত্ৰী পবিত্ৰ মাৰ্ঘেৰিটা।