Brahmaputra Times
ভাৰত-ভূটান সীমান্তৱৰ্তী মানাহ ৰাষ্ট্ৰীয় উদ্যানৰ পাণবাৰীৰ পালেংচি বিটৰ পৰা কিছু নিলগত তিনিটাকৈ বন্যহস্তীক গুলীয়াই হত্যা কৰাৰ খবৰ পোহৰলৈ আহিছে৷ এই ঘটনাই সমগ্ৰ ৰাজ্যত তীব্ৰ প্ৰতিক্ৰিয়াৰ সৃষ্টি কৰিছে৷ প্ৰকৃতি প্ৰেমীসকলৰ মাজত ক্ষোভৰ সৃষ্টি কৰিছে৷ যিখন চৰকাৰ বনভূমি ৰক্ষা কৰাৰ লগতে চোৰাং চিকাৰ ৰোধ কৰা বুলি দাবী কৰি আহিছে সেইখন চৰকাৰৰ দিনতে তিনিটাকৈ বনৰীয়া বধ কৰা ঘটনাক সহজে ল’ব পৰা নাই প্ৰকৃতি প্ৰেমীয়ে৷ জানিব পৰা মতে, আজি মানাহ ৰাষ্ট্ৰীয় উদ্যানৰ পাণবাৰী বনাঞ্চলিক কাৰ্যালয়ৰ অন্তৰ্গত ঘন জংঘলত তিনিটাকৈ মৃত হাতীৰ শৰীৰ উদ্ধাৰ হয়৷ ৰাষ্ট্ৰীয় উদ্যানখনৰ ঘন জংঘলত তিনিটা হাতী বধ কৰি চোৰাং চিকাৰীয়ে পেলাই থৈ যোৱাৰ সন্দেহ কৰা হৈছে৷ কিয়নো হাতী কেইটাৰ শৰীৰত আঘাতৰ বৃহৎ চিন স্পষ্ট বুলি দাবী কৰিছে এটা সূত্ৰই৷ এই ঘটনা চোৰাং চিকাৰীয়ে সংঘটিত কৰাৰ সন্দেহ কৰিছে যদিও এতিয়ালৈকে কোনধৰণৰ তথ্য পাবলৈ সক্ষম হোৱা নাই বন বিভাগ। ঘটনা পোহৰলৈ অহাৰ পিছতে বন বিভাগৰ বৃহৎ দলে অভিযান আৰম্ভ হৈছে৷ ইতিমধ্যে পাণবাৰী বন বিভাগৰ বৃহৎ দ’ল ঘটনাস্থলিত উপস্থিত হৈ চোৰাং চিকাৰীৰ বিৰুদ্ধে অভিযান তীব্ৰতৰ কৰা দেখা গৈছে। পাণবাৰী বনাঞ্চলিক কাৰ্যালয়ৰ অন্তৰ্গত মানাহ ৰাষ্ট্ৰীয় উদ্যানৰ ভিতৰত চোৰাং চিকাৰীয়ে তিনিটা হাতী নিধন কৰাৰ খবৰে তীব্ৰ চাঞ্চল্যৰ সৃষ্টি কৰিছে।
