ডিজিটেল ডেস্কঃ সহকৰ্মী মহিলা অভিনেত্ৰীক যৌন নিৰ্যাতনৰ অভিযোগ উত্থাপন হৈছে মালায়ালম অভিনেতা ছিদ্দিকৰ বিৰুদ্ধে। অভিনেত্ৰীগৰাকীৰ এজাহাৰৰ পিছতে অভিনতাজনৰ বিৰুদ্ধে জামিনবিহীন অপৰাধত গোচৰ ৰুজু কৰিছে কেৰালাৰ ত্ৰিবেন্দ্ৰম মিউজিয়াম আৰক্ষীয়ে।

উল্লেখ্য যে, সোমবাৰে সন্ধিয়া মালয়ালম চলচ্চিত্ৰ জগতত যৌন নিৰ্যাতনৰ অভিযোগৰ তদন্তৰ বাবে গঠন কৰা বিশেষ তদন্তকাৰী দল (এছ আই টি)ত অভিনেতা ছিদ্দিকৰ বিৰুদ্ধে অভিযোগ দাখিল কৰিছিল অভিনেত্ৰীগৰাকীয়ে।

অভিনেত্ৰীগৰাকীৰ অভিযোগ অনুসৰি ২০১৬ চনত তেওঁৰ ওপৰত ছিদ্দিকে চলাইছিল শাৰীৰিক নিৰ্যাতন। এখন ছবিৰ বিষয়ে আলোচনা কৰাৰ অচিলাৰে অভিনেত্ৰীগৰাকীক ছিদ্দিকে মেস্কট হোটেলৰ কোঠালৈ মাতি নি যৌন নিৰ্যাতন চলোৱাৰ অভিযোগ উত্থাপন কৰে অভিনেত্ৰীগৰাকীয়ে।

ইফালে, ছিদ্দিকে আৰক্ষী সঞ্চালক প্ৰধানৰ ওচৰত এজাহাৰ দাখিল কৰি দাবী কৰে যে এই অভিযোগ তেওঁৰ ভাবমূৰ্তি কলংকিত কৰাৰ এক অপচেষ্টা বুলি প্ৰত্যাভিযোগ কৰে। নিজকে নিৰ্দোষী বুলি দাবী কৰি অভিনেতাগৰাকীয়ে কয় যে ২০১৬ চনত তেওঁ অভিনেত্ৰীগৰাকীক এবাৰ লগ পাইছিল যদিও সেই সময়ত অভিনেত্ৰীগৰাকীৰ পিতৃ-মাতৃও লগত উপস্থিত আছিল। তাৰ পিছত অভিনেত্ৰীগৰাকীক পুনৰবাৰ লগ নোপোৱা বুলি দাবী কৰে ছিদ্দিকে।

প্ৰণিধানযোগ্য যে, চলিত সপ্তাহৰ আৰম্ভণিতে যৌন নিৰ্যাতনৰ অভিযোগৰ পিছতে ছিদ্দিকে এছ’চিয়েশ্যন অৱ মালয়ালম মুভি আৰ্টিষ্টৰ সাধাৰণ সম্পাদকৰ পদৰ পৰা পদত্যাগ কৰিছিল।