গুৱাহাটীঃ অসুস্থ অখিল গগৈ বৰ্তমান চিকিৎসাধীন হৈ আছে গুৱাহাটী চিকিৎসা মহাবিদ্যালয় হাস্পতালত। আজি তেওঁ অলপমান সুস্থ হৈ উঠিছিল। সেয়ে বিধানসভালৈ যোৱাৰ যো-জা চলাইছিল শিৱসাগৰ সমষ্টিৰ বিধায়কগৰাকীয়ে। ৰাজ্যৰ সাম্প্ৰতিক পৰিস্থিতিক লৈ বিধানসভা চৌহদত প্ৰতিবাদ জনাবলৈ এখন বেনাৰ বনাবলৈ দিছিল গগৈয়ে। কিন্তু অখিল গগৈয়ে বেনাৰ বনাবলৈ দিয়া প্ৰেছটোক ঘেৰাই কৰি ৰখাৰ লগতে তেওঁক জি এম চি এইচৰ পৰা ওলাবলৈ নিদিয়াৰ গুৰুতৰ অভিযোগ উত্থাপন কৰিছে অখিল গগৈয়ে।
শুকুৰবাৰে পুৱা এটা পোষ্ট কৰি অখিল গগৈয়ে লিখিছে, ‘‘অলপ সুস্থ হৈছিলো বাবে আজি বিধানসভালৈ যাবলৈ সাজু হৈছিলো। এখন বেনাৰ বনাইছিলো বৰ্তমান পৰিস্থিতিক লৈ। পুলিচে প্ৰেছটোকে ঘেৰাও কৰিছে আৰু মোকো জিএমচিৰ পৰা ওলাবলৈ অনুমতি নিদিলে!’’
অখিল গগৈৰ এই গুৰুতৰ অভিযোগক লৈ সৃষ্টি হয় প্ৰতিক্ৰিয়াৰ। আনহাতে ইয়াৰ কিছু সময় পিছত ছ’চিয়েল মিডিয়াত দুখন কাৰ্টুল সংলগ্ন কৰি আন এটা পোষ্ট দিয়ে অখিল গগৈয়ে। এজন মিঞা মুছলমানৰ কান্ধত উঠি থকা কপালত তিলক লগোৱা এজন হিন্দু নেতা (হিমন্ত বিশ্ব শৰ্মা)ৰ এই কাৰ্টুনখনত লিখা আছিল- ‘মিয়া অ’ মিয়া, ২৬ৰ বৈতৰণী পাৰ কৰি দিয়া’।
এই পোষ্টটোৰ কেপচনত অখিল গগৈয়ে তেওঁৰ লগতে ভাস্ক’ ডি শইকীয়াৰ ফোন টেপিং কৰাৰ অভিযোগ কৰি কাৰ্টুন দুখন প্ৰিণ্ট কৰা প্ৰেছটোত আৰক্ষীয়ে অভিযান চলোৱাৰ কথাও উল্লেখ কৰে।
ইফালে, জনপ্ৰিয় কাৰ্টুনিষ্ট নিতুপৰ্ণ ৰাজবংশীয়ে অখিল গগৈয়ে পোষ্টত ব্যৱহাৰ কৰা কাৰ্টুন তেওঁৰ পৰা নকল কৰাৰ অভিযোগ উত্থাপন কৰে। কাৰ্টুনিষ্টগৰাকীয়ে সামাজিক মাধ্যমত এটা পোষ্ট কৰি লিখিছে, ‘‘এই কাৰ্টুনখনৰ বিষয়বস্তু যোৱা ২৮ আগষ্টত প্ৰকাশিত আমাৰ সংশ্লিষ্ট কাৰ্টুনখনৰ পৰা নকল কৰা হৈছে। অখিল গগৈৰ দৰে এজন দায়বদ্ধ ৰাজনীতিকে এনে দুষ্কাৰ্যৰ পোষকতা কৰাটো অতি নিন্দনীয় আৰু আমাৰ শিল্পকৰ্মৰ প্ৰতি চূড়ান্ত অপমান।’’