ডিজিটেল ডেস্কঃ মুক্তিৰ পূৰ্বেই বিতৰ্কত সোমাই পৰিছে অভিনেত্ৰী তথা বিজেপি সাংসদ কংগনা ৰানাৱটৰ নতুন ছবি ‘ইমাৰ্জেন্সী’। ছবিখনৰ টিজাৰ মুকলি কৰাৰ পিছতে শিখ সম্প্ৰদায়ক ছবিখনৰ জৰিয়তে সন্ত্ৰাসবাদী আৰু বিচ্ছিন্নতাবাদী সজোৱাৰ অভিযোগ উত্থাপন হৈছে।

জানিব পৰা মতে, মঙলবাৰে কংগনা ৰানাৱট আৰু ‘ইমাৰ্জেন্সী’ৰ নিৰ্মাতালৈ আইনী জাননী জাৰি কৰিছে পঞ্জাৱৰ শিৰোমণি গুৰুদ্বাৰা প্ৰৱন্ধক কমিটীয়ে।

শিৰোমণি কমিটীৰ আইনী উপদেষ্টা অমনবীৰ সিং ছিয়ালিয়ে প্ৰেৰণ কৰা জাননীত কংগনা ৰানাৱতকে ধৰি ছবিখনৰ প্ৰযোজকসকলক ৰাজহুৱা আৰু ছ’চিয়েল মিডিয়া প্লেটফৰ্মৰ পৰা মুক্তি পোৱা ছবিখনৰ ট্ৰেইলাৰ আঁতৰাই শিখ সম্প্ৰদায়ৰ ওচৰত লিখিতভাৱে ক্ষমা বিচাৰিবলৈ কোৱা হৈছে।

শিৰোমণি কমিটীৰ সম্পাদক প্ৰতাপ সিঙে কয় যে ভাৰত চৰকাৰৰ তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱ আৰু কেন্দ্ৰীয় চলচ্চিত্ৰ চেন্সৰ ব’ৰ্ডৰ অধ্যক্ষ প্ৰসুন যোশীলৈ কেইবাবাৰো পত্ৰ লিখি এই ছবিখন বন্ধ কৰিবলৈ আহ্বান জনোৱা হৈছিল।

শিৰোমণি কমিটীৰ অধ্যক্ষ অধিবক্তা হৰজিন্দৰ সিং ধামীৰ নিৰ্দেশ অনুসৰি কংগনা ৰানাৱতকে ধৰি এই ছবিখনৰ প্ৰযোজকলৈ আইনী জাননী প্ৰেৰণ কৰা হৈছে।

ধামীয়ে কয় যে ইমাৰ্জেন্সী ছবিখনৰ ট্ৰেইলাৰ মুক্তি পোৱাৰ পিছত বহু শিখ বিৰোধী দৃশ্য পোহৰলৈ আহিছে, যিয়ে শিখ সম্প্ৰদায়ৰ আৱেগক গভীৰভাৱে আঘাত কৰিছে। শিখসকলক সন্ত্ৰাসবাদী আৰু বিচ্ছিন্নতাবাদী হিচাপে দেখুৱাবলৈ ছবিখনত এক প্ৰয়াস কৰা হৈছে, যিটো গ্ৰহণযোগ্য নহয়।

প্ৰতাপ সিঙে কয় যে ছবিখনৰ ট্ৰেইলাৰ মুক্তি পোৱাৰ পিছত শিখ সমাজত ব্যাপক প্ৰতিবাদৰ সৃষ্টি হৈছে, যাৰ প্ৰতি লক্ষ্য ৰাখি শিৰোমণি কমিটীয়ে আইনী ব্যৱস্থা গ্ৰহণ কৰিছে।

তেওঁ কয় যে যদি আপত্তিজনক শিখ বিৰোধী দৃশ্য কংগনা ৰানাৱট আৰু ছবি নিৰ্মাতাসকলে ছবিখনৰ পৰা কৰ্তন নকৰে, তেন্তে তেওঁলোকৰ বিৰুদ্ধে সকলো স্তৰতে আইনী ব্যৱস্থা গ্ৰহণ কৰা হ’ব।