গুৱাহাটীঃ সংবাদ মাধ্যমেৰে বাৰ্তালাপৰ সময়ত এগৰাকী মুছলমান সাংবাদিকে কৰা প্ৰশ্নৰ উত্তৰ দিব নোৱাৰি মুখ্যমন্ত্ৰী হিমন্ত বিশ্ব শৰ্মাই সেই প্ৰশ্নক সাম্প্ৰদায়িক ৰূপ দিয়া কাৰ্য্যক তীব্ৰ ভাষাৰে নিন্দা কৰিছে চিপিআই (এম)ৰ অসম ৰাজ্যিক সমিতিয়ে।

উল্লেখ্য যে, ২১ আগষ্টত মুখ্যমন্ত্ৰীৰ সমষ্টিৰ অন্তৰ্গত অঞ্চলতে অবাধ পাহাৰ খনন চলি থকা সন্দৰ্ভত শ্বাহ আলম নামৰ সাংবাদিক এজনে মুখ্যমন্ত্ৰী শৰ্মাক প্ৰশ্ন সোধাত মুখ্যমন্ত্ৰীজনে সঠিক উত্তৰ দিব নোৱাৰি বিব্রত হৈ পৰে আৰু সাংবাদিকজনৰ নামটোকলৈ অতি নীচ সাম্প্ৰদায়িক মন্তব্যৰে তেওঁৰ উৎকট মুছলমান বিদ্বেষ ৰাজহুৱাকৈ প্ৰকাশ কৰে।

মান্দাকাটা অঞ্চলৰ অবৈধ পাহাৰ খনন সন্দৰ্ভত সাংবাদিকৰ প্ৰশ্নৰ উত্তৰ দিবলৈ গৈ মুখ্যমন্ত্ৰী শৰ্মাই অযথা গুৱাহাটীৰ কৃত্ৰিম বানপানী আৰু ইউএছটিএমৰ প্ৰসংগ টানি আনে। এইদৰে মুখ্যমন্ত্ৰীজনে চৰকাৰৰ ব্যৰ্থতা ঢাকি ৰখা তথা মূল সমস্যাৰ পৰা জনসাধাৰণৰ দৃষ্টি আঁতৰাই অনাৰ বাবে সকলো ঘটনা সম্পৰ্কত সাম্প্ৰদায়িক ব্যাখ্যা দাঙি ধৰি ৰাইজক বিভ্ৰান্ত কৰাৰ কৌশল অৱলম্বন কৰে। সাংবাদিক শ্বাহ আলম মুছলমান সম্প্ৰদায়ৰ হোৱা বাবেই মুখ্যমন্ত্ৰী খঙত টিঙিৰি তুলা হৈ পৰে আৰু সেই অজুহাতত সম্প্ৰদায়টোৰ বিৰুদ্ধে বিষোদগাৰ প্ৰকাশ কৰে।

চি পি আই (এম)ৰ ৰাজ্যিক সমিতিয়ে মুখ্যমন্ত্ৰীৰ এনে সাম্প্ৰদায়িক বিভাজনৰ ৰাজনীতিৰ তীব্ৰ বিৰোধিতা কৰি মুখ্যমন্ত্ৰীগৰাকীৰ এনে আচৰণ দুৰ্ভাগ্যজনক বুলি অভিহিত কৰে। ৰাজ্যত ধৰ্মনিৰপেক্ষ প্ৰমূল্যসমূহৰ লগতে নাগৰিক সমাজ তথা সাংবাদ মাধ্যমৰ স্বাধীনতা ৰক্ষাৰ হকে আগুৱাই আহিবলৈ দলটোৱে ৰাজ্যৰ গণতন্ত্ৰপ্ৰেমী জনসাধাৰণৰ প্ৰতি আহ্বান জনায়।