ডিজিটেল ডেস্কঃ ভিনিহিয়েকৰ বাইকৰ পিছত উঠি বায়েকৰ ঘৰলৈ গৈ আছিল খুলশালীয়েক। সেই সময়তে পিছফালৰ পৰা অহা এখন তীব্ৰবেগী ট্ৰাকে মহটিয়াই লৈ যোৱাত অকাল মৃত্যুক সাৱটিবলগীয়া হয় ভিনিহিয়েক-খুলশালীয়েক দুয়োজনে। এই মৰ্মান্তিক দুৰ্ঘটনা সংঘটিত হৈছে বিহাৰৰ মতিহাৰীত।

জানিব পৰা মতে, ছিৰনী মালাহীৰ বাসিন্দা ৰানু মাহাতোৱে বৃহস্পতিবাৰে নিশা পশ্চিম চম্পাৰানৰ গুৰদৰা গাঁৱস্থিত শহুৰেকৰ ঘৰৰ পৰা নিজৰ ঘৰলৈ বাইকেৰে আহিছিল। তেওঁৰ লগতে আহিছিল পত্নীৰ ভগ্নী তথা খুলশালীয়েক সন্ধ্যা কুমাৰীও। তেওঁলোক দুয়োজনে বাইকেৰে আহি থকাৰ সময়তে চিকাৰহানা দলঙৰ সমীপত পিছফালৰ পৰা একন তীব্ৰবেগী ট্ৰাকে প্ৰচণ্ড জোৰে খুন্দা মাৰে।

ট্ৰাকৰ খুন্দাৰ ফলত পথৰ ওপৰত ছিটিকি পৰা ভিনিহিয়েক-খুলশালী দুয়োজনৰে থিতাতে মৃত্যু ঘটে। ইফালে দুৰ্ঘটনাৰ সময়ত হোৱা প্ৰচণ্ড শব্দ শুনি ওলাই অহা স্থানীয় ৰাইজে আটক কৰিবলৈ সক্ষম হয় পলায়নৰ চেষ্টা চলোৱা ট্ৰাক চালকজনক।

ঘটনাৰ পিছত আৰক্ষীৰ দল উপস্থিত হৈ মৃতদেহ দুটা উদ্ধাৰ কৰাৰ লগতে ট্ৰাকখন জব্দ কৰিছে। এই দুৰ্ঘটনাই সমগ্ৰ অঞ্চলটোতে শোকাকুল পৰিৱেশৰ সৃষ্টি কৰিছে।