যোৰহাটৰ আজান গাঁৱৰ ৰাজপথত বুধবাৰে এক ভয়াৱহ পথ দুৰ্ঘটনা সংঘটিত হয়। এই দুৰ্ঘটনাত দুজন ছাত্ৰ থিতাতে নিহত হোৱাৰ লগতে গুৰুতৰভাৱে আঘাতপ্ৰাপ্ত হয় আন দুগৰাকী ছাত্ৰী। দুৰ্ঘটনাত থিতাতে নিহত হোৱা ছাত্ৰ দুজনক গোৱালপাৰাৰ মছতাফা মুজাহিদ আৰু যোৰহাট লিচুবাৰীৰ ইৰফান হুছেইন বুলি চিনাক্ত কৰা হৈছে। আহত হোৱা ছাত্ৰী দুগৰাকী হ’ল যোৰহাট চিনামৰাৰ খুছবু নভেল আৰু শোণিতপুৰৰ আৰিণা বড়ো। আহত ছাত্ৰী দুগৰাকী সম্প্ৰতি যোৰহাট চিকিৎসা মহাবিদ্যালয় হাস্পতালত চিকিসাধীন হৈ আছে। প্ৰত্যক্ষদৰ্শীসকলে জনোৱামতে ছাত্ৰ-ছাত্ৰীকেইগৰাকী আহি থকা ৰঙা ৰঙৰ চাৰিচকীয়া ডাটছন গ’ বাহনখনে আজান গাঁৱৰ সমীপত পথৰ ডিভাইদাৰত তীব্ৰবেগে খুন্দা মাৰে। ফলত গাড়ীখনত চুচূৰ্মৈ হৈ পৰাৰ লগতে ভিতৰত থকা ছাত্ৰ-ছাত্ৰীকেইগৰাকী উফৰি বাহিৰত পৰি যায়। নিহত দুই ছাত্ৰ আৰু আহত ছাত্ৰী দুগৰাকী কাজিৰঙা বিশ্ববিদ্যালয়ত অধ্যয়নৰত আছিল বুলি জানিব পৰা গৈছে। উল্লেখ্য যে, গোৱালপাৰা চহৰৰ ২ নম্বৰ কল্পনা নগৰৰ বাসিন্দা মছতাফা মুজাহিদ বিশ্ববিদ্যালয়খনৰ এমবিএৰ চূড়ান্ত বৰ্ষৰ ছাত্ৰ আছিল। তীব্ৰবেগৰ বাবেই বাহনখন দুৰ্ঘটনাত পতিত হয় বুলি প্ৰত্যক্ষদৰ্শীসকলে জানিবলৈ দিছে। অধিক তথ্যৰ বাবে ঘটনা সন্দৰ্ভত আৰক্ষীয়ে অনুসন্ধান আৰম্ভ কৰিছে।