
পঞ্চায়ত নিৰ্বাচনৰ ঘোষণাৰ দিনটোতে শিৱসাগৰত বিজেপি-ৰাইজৰ দলৰ মাজত মাৰপিট লগা দেখা গৈছে। মহিলা কৰ্মীৰ ওপৰত যৌন হাৰাশাস্তিৰ অভিযোগ উঠিছে।
পঞ্চায়ত নিৰ্বাচনৰ তাৰিখ ঘোষণাৰ দিনটোতে শিৱসাগৰৰ গৌৰীসাগৰ খণ্ড উন্নয়ণ বিষয়া কাৰ্যালয় চৌহদত বিজেপি আৰু ৰাইজৰ দলৰ কৰ্মী-সমৰ্থকৰ মাজত ভয়াবহ খণ্ডযুদ্ধ আৰু মাৰপিটৰ ঘটনাই উত্তপ্ত পৰিৱেশ সৃষ্টি কৰে। ঘটনাটোৰ সৈতে জড়িত হৈ থকা অভিযোগত এগৰাকী মহিলা কৰ্মীক যৌন হাৰাশাস্তি কৰা, কাপোৰ ছিঙি দিয়া আদি গুৰুতৰ অভিযোগো উঠিছে।
অসম দৰ্শন আঁচনিৰ অধীনত চেক বিতৰণৰ এক অনুষ্ঠানৰ সময়ত উত্তেজনাৰ সূচনা হয়। নিৰ্ধাৰিত সময়ৰ আগতেই চেক বিতৰণ আৰম্ভ কৰাত ৰাইজৰ দলৰ কৰ্মীয়ে বাধা দিয়ে। ইয়াৰ পিছত বিজেপি আৰু ৰাইজৰ দলৰ মাজত তৰ্কা-তৰ্কিৰ পৰা মাৰপিটলৈ ৰূপান্তৰিত হয়। বিধায়ক অখিল গগৈৰ ব্যক্তিগত সহায়ক অম্লানজ্যোতি গগৈসহ কেইবাজনো আহত হয়।
ৰাইজৰ দলৰ শিৱসাগৰ সমষ্টিৰ সাংগঠনিক সম্পাদিকাই গৌৰীসাগৰ আৰক্ষী থানাত এজাহাৰ দাখিল কৰি কয় যে বিজেপি কৰ্মী সূৰ্য কায়ুংগই মহিলাৰ গোপন অংগত হাত দিয়াৰ লগতে কাপোৰ ছিঙিবলৈ চেষ্টা কৰে।