ডিজিটেল ডেস্কঃ শুকুৰবাৰে নেপালত দুৰ্ঘটনাত পতিত হয় ভাৰতৰ এখন যাত্ৰীবাহী বাছ। চুবুৰীয়া দেশখনৰ তানাহুন জিলাৰ মৰছাংগী নদীত নিয়ন্ত্ৰণ হেৰুৱাই বাগৰি পৰে ৪০ জন যাত্ৰী কঢ়িয়াই নিয়া ভাৰতীয় বাছখন।

তানাহুন জিলা আৰক্ষীৰ ডি এছ পি দীপকুমাৰ ৰায়ে কয় এই তথ্য সদৰী কৰি কয় যে দুৰ্ঘটনাগ্ৰস্ত বাছখন উত্তৰ প্ৰদেশৰ নম্বৰ প্লেটৰ আছিল। জানিব পৰা দুৰ্ঘটনাৰ সময়ত বাছখন কাঠমাণ্ডুৰ পৰা পোখাৰালৈ গৈ আছিল।

এই পৰ্যন্ত মুঠ ১৪টা মৃতদেহ উদ্ধাৰ কৰা হৈছে। অৱশ্যে দুৰ্ঘটনাৰ ভয়াৱহতা দেখি কেইবাজনো যাত্ৰীৰ মৃত্যুৰ আশংকা কৰা হৈছে। ইতিমধ্যে এই ঘটনাৰ কেইবাটাও ভিডিঅ’ সংবাদ মাধ্যমত ভাইৰেল হৈ পৰিছে।

ইফালে উত্তৰ প্ৰদেশৰ এজন চৰকাৰী বিষয়াই কয় যে এই প্ৰসংগত সেই বাছখনৰ পঞ্জীয়ন নম্বৰ পৰীক্ষা কৰা হৈছে। বাছখনৰ মালিক আৰু সেই বাছখনত কোনে যাত্ৰা কৰিছিল তাৰ তদন্ত কৰা হ’ব। বিগত কিছুদিন ধৰি নেপালত ধাৰাসাৰ বৰষুণ দি আছে। ইয়াৰ ফলত বিভিন্ন অঞ্চলত প্ৰাকৃতিক দুৰ্যোগৰো সৃষ্টি হৈছে। এই বাৰিষাত এতিয়ালৈকে নেপালত ৬২ জন লোকৰ মৃত্যু হৈছে। আহত হৈছে ৯০জন লোক। অনুমান কৰা হৈছে যে পিছল পথটোৰে পাৰ হৈ যাওঁতে বাছখন দুৰ্ঘটনাগ্ৰস্ত হৈ নদীত বাগৰি পৰে।

জুলাই মাহত নেপালতো একেধৰণৰ দুৰ্ঘটনা সংঘটিত হৈছিল। যাত্ৰীবাহী দুখন বাছ পথৰ পৰা বাগৰি পৰে উত্তাল ত্ৰিশুলি নদীত। এই ঘটনাত নিৰুদ্দেশ হৈছিল ৬৩ জন যাত্ৰী। এই তালিকাত সাতজন ভাৰতীয়ও আছিল।