আমেৰিকাৰ পৰা ভাৰতীয় মানুহক নিৰ্মমভাৱে হাতত শিকলি বান্ধি যুক্তৰাষ্ট্ৰৰ সেনাৰ কাৰ্গো বিমানত বিতাড়ন কৰা জঘন্য ঘটনাৰ বিৰুদ্ধে আজি অসম প্ৰদেশ কংগ্ৰেছে ৰাজ্যজুৰি প্ৰতিবাদ সাব্যস্ত কৰে৷ বিশ্বগুৰু বুলি নিজকে ঘোষণা কৰা প্ৰধানমন্ত্ৰী নৰেন্দ্ৰ মোদীয়ে সময়ে সময়ে ডনাল্ড ট্ৰাম্প তেওঁৰ বন্ধু বুলি জাহিৰ কৰি আহিছে যদিও সেই ডনাল্ড ট্ৰাম্পে পুনৰ শাসনভাৰ লৈয়ে আমেৰিকা যুক্তৰাষ্ট্ৰত থকা ভাৰতীয় নাগৰিকসকলক নিৰ্দয়ভাৱে খেতি পঠোৱা কাৰ্যক তীব্ৰ বিৰোধিতা কৰিছে অসম প্ৰদেশ কংগ্ৰেছে৷ সমগ্ৰ দেশত আজি এনে কাৰ্যৰ বিৰুদ্ধে কংগ্ৰেছে প্ৰতিবাদ সাব্যস্ত কৰে৷ সেই প্ৰতিবাদী কাৰ্যসূচীৰ সৈতে সংগতি ৰাখি গুৱাহাটীৰ ৰাজীৱ ভৱনত দিনৰ ১১.৩০ বজাৰ পৰা বিজেপিৰ বৈদেশিক নীতি হায়ঃ হায়ঃ, ডলাল্ড ট্ৰাম্প-মোদী ভাই ভাই, ভাৰতীয়ৰ আজি কিয় মান নাই আদি শ্ল’গান দিয়ে৷ আমেৰিকা যুক্তৰাষ্ট্ৰত সংস্থাপন বিচাৰি যোৱা ভাৰতীয়ক অমানৱীয়ভাৱে বিতাড়িত কৰাৰ ঘটনাৰ তীব্ৰ প্ৰতিবাদ জনায়৷ গুৱাহাটীৰ লগতে ৰাজ্যৰ আন আন প্ৰান্ততো আজি এনেদৰে প্ৰতিবাদী কাৰ্যসূচী ৰূপায়ন কৰে৷ প্ৰদেশ কংগ্ৰেছৰ সভাপতি ভূপেন বৰাই লখিমপুৰৰ প্ৰতিবাদী কাৰ্যসূচীত অংশ লয়৷ কংগ্ৰেছৰ নেতা-কৰ্মী ৰাজপথলৈ ওলাই আহি নৰেন্দ্ৰ মোদীয়ে অসমৰ পৰা বিদেশী বহিস্কাৰ কৰিব নোৱাৰাত মোদীক ধিক্কাৰ দিয়ে৷ আজি ৰাজীৱ ভৱনৰ সন্মুখত প্ৰতিবাদৰ সময়তে গুৱাহাটী আৰক্ষীয়ে প্ৰদেশ কংগ্ৰেছৰ কেইবাগৰাকী জ্যেষ্ঠ আৰু কনিষ্ঠ নেতাক আটক কৰে৷ বিধায়ক কথা কাৰ্যকৰী সভাপতি জাকিৰ হুছেইন সিকদাৰ, নন্দিতা দাস, উমেশ ডেকা, দেৱী ডেকা কৰ্মকাৰ, বাহাৰুল ইছলাম, খলিলুৰ ৰহমান, আখতাৰ হুছেইন, নাজিৰুদ্দিন আহমেদ, ৰাজু আহমেদ, জাহানুদ্দিন, জাকিৰ হুছেইন, আৰিফুল আলম হাজৰিকাক আটক কৰে গুৱাহাটী আৰক্ষীয়ে৷ প্ৰদেশ কংগ্ৰেছৰ কাৰ্যকৰী সভাপতি জাকিৰ হুছেইন সিকদাৰ, ৰাজ্যিক মহিলা কংগ্ৰেছৰ সভানেত্ৰী মীৰা বৰঠাকুৰ, প্ৰাক্তন সাংসদ, আৰ.পি শৰ্মা, বিধায়িকা নন্দিতা দাস, বিধায়ক ৰেকবুদ্দিন আহমেদ, কামৰূপ জিলা কংগ্ৰেছৰ সভাপতি গোপাল শৰ্মা আদিয়ে ৰাজীৱ ভৱনৰ কাৰ্যসূচীত অংশ লয়৷ জ্যেষ্ঠ নেতাসকলৰ উপস্থিতিত কেইবা শতাধিক কৰ্মী-সমৰ্থকে প্ৰতিবাদ জনায়৷ প্ৰতিবাদী কাৰ্যসূচীৰ পূৰ্বে বিদেশ নীতিত বিফল মোদী চৰকাৰৰ বিৰুদ্ধে এখন প্ৰতিবাদী সভা অনুষ্ঠিত হয়৷ প্ৰতিবাদী সভাৰ আঁতধৰে সাংগঠনিক সম্পাদক বিপুল কুমাৰ গগৈয়ে৷ গুৱাহাটীৰ লগতে ৰাজ্যজুৰি সাব্যস্ত কৰা প্ৰতিবাদী কাৰ্যসূচীত বহু জ্যেষ্ঠ নেতা-নেত্ৰীৰ উপস্থিতিত তীব্ৰ প্ৰতিবাদ কৰা হয়৷