Brahmaputra Times
ডিজিটেল ডেস্কঃ ব্যস্ত জীৱনৰ পৰা অলপমান সকাহ বিচাৰি কোনো এখন নতুন ঠাইলৈ ভ্ৰমণ কৰিব বিচাৰিছে নেকি? তেন্তে হয়তো শীঘ্ৰেই আপোনাৰ বাবে সম্ভৱ হ’ব বিশ্বৰ আটাইতকৈ বিপজ্জনক দেশখন ভ্ৰমণ কৰাৰ।
বাতৰি অনুসৰি, এই বছৰৰ শেষৰ ফালে অৰ্থাৎ ডিচেম্বৰ মাহত আন্তঃৰাষ্ট্ৰীয় পৰ্যটকৰ বাবে সীমান্ত মুকলি কৰিবলৈ সাজু হৈছে বিশ্বৰ আটাইতকৈ বিপজ্জনক দেশ হিচাপে পৰিচিত উত্তৰ কোৰিয়াই।
ট্যুৰ কোম্পানীসমূহৰ মতে, বিগত প্ৰায় ৫ বছৰৰ পিছত উত্তৰ কোৰিয়াৰ উত্তৰ-পূবৰ ছামজিয়ান চহৰৰ সীমান্তৰ লগতে দেশখনৰ আন আন অংশলৈ ভ্ৰমণৰ বাবে আন্তঃৰাষ্ট্ৰীয় পৰ্যটকৰ বাবে দুৱাৰ মুকলি কৰি দিছে কিম জং উনৰ চৰকাৰে।
প্ৰণিধানযোগ্য যে, ক’ভিড নিষেধাজ্ঞাৰ বাবে ২০২০ চনত আন্তঃৰাষ্ট্ৰীয় পৰ্যটকক দেশত প্ৰৱেশত নিষেধাজ্ঞা জাৰি কৰিছিল উত্তৰ কোৰিয়াই।
ইয়াৰ পিছত বিগত প্ৰায় ৫ বছৰত ৰাছিয়াৰ এটা সৰু পৰ্যটকৰ দল আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনেহে উত্তৰ কোৰিয়া ভ্ৰমণৰ অনুমতি লাভ কৰিছিল।
বেইজিংস্থিত কোম্পানী ক’ৰিঅ’ ট্যুৰেছে কয় যে উত্তৰ কোৰিয়াৰ পৰ্যটন আকৌ এবাৰ মুকলি কৰাৰ বাবে তেওঁলোক অতিশয় উৎসাহিত হৈ পৰিছে।
ট্ৰেভেল ফাৰ্মখনে কয় যে অনাগত সপ্তাহত ভ্ৰমণসূচী নিশ্চিত কৰা হ’ব আৰু ডিচেম্বৰ মাহত ছামজিয়নলৈ আন্তঃৰাষ্ট্ৰীয় পৰ্যটন পুনৰ আৰম্ভ হ’ব।
চীনৰ সীমান্তৱৰ্তী চহৰ ছামজিয়নত উত্তৰ কোৰিয়াই “সমাজবাদী ইউটোপিয়া” বুলি কোৱা ঠাইখন গঢ়ি তুলিছে।
“উচ্চ সভ্য পাহাৰীয়া চহৰ” সৃষ্টিৰ প্ৰকল্পৰ অংশ হিচাপে নতুন এপাৰ্টমেণ্ট, স্কি ৰিজৰ্ট আৰু বাণিজ্যিক, সাংস্কৃতিক আৰু চিকিৎসাৰ সুবিধা নিৰ্মাণ কৰা হৈছে।
