ডিজিটেল ডেস্কঃ আজি দেশত উদযাপন কৰা হ’ল ৭৮ সংখ্যক স্বাধীনতা দিৱস। এই উপলক্ষ্যে আজি দিল্লীৰ লালকিল্লাত ত্ৰিৰংগা উত্তোলন কৰি একেৰাহে একাদশ বাৰৰ বাবে দেশবাসীক সম্বোধন জনায় প্ৰধানমন্ত্ৰী নৰেন্দ্ৰ মোদীয়ে।

উদযাপনৰ আৰম্ভণিতে প্ৰধানমন্ত্ৰীয়ে ৰাষ্ট্ৰীয় পতাকা উত্তোলন কৰে, যিটো অনুষ্ঠানৰ পিছতে এক দৰ্শনীয় আকাশী প্ৰদৰ্শন কৰা হয়। ভাৰতীয় বায়ুসেনাৰ দুখন এডভান্সড লাইট হেলিকপ্টাৰ ধ্ৰুৱ, লাইন এষ্টাৰ্ন ফৰ্মেচনত উৰুৱাই সভাস্থলীৰ ওপৰেৰে পুষ্পবৃষ্টি কৰে। উইং কমাণ্ডাৰ অম্বাৰ আগৰৱাল আৰু উইং কমাণ্ডাৰ ৰাহুল নৈনৱালে হেলিকপ্টাৰকেইখনৰ কেপ্তেইন হিচাপে এই অনুষ্ঠানৰ সৌষ্ঠৱ বৃদ্ধি কৰে।

ত্ৰিৰংগা উত্তোলনৰ পিছত প্ৰধানমন্ত্ৰীয়ে ৰাষ্ট্ৰীয় সংগীতৰ সমান্তৰালভাৱে ‘ৰাষ্ট্ৰীয় চেলুট’ লাভ কৰে। এজন জুনিয়ৰ কমিছনড অফিচাৰ (জেচিঅ’) আৰু ২৫টা অদাৰ ৰেংকৰে গঠিত পঞ্জাব ৰেজিমেণ্ট মিলিটাৰী বেণ্ডে নিখুঁতভাৱে এই সংগীত পৰিৱেশণ কৰে। অনুষ্ঠানৰ সময়ত চুবেদাৰ মেজৰ ৰাজিন্দৰ সিঙে বেণ্ডটোক নেতৃত্ব দি সেই মুহূৰ্তৰ গৌৰৱ আৰু সন্মানক সামৰি লয।

লালকিল্লাত উপস্থিত হোৱাৰ পূর্বে প্রধানমন্ত্রী মোদীয়ে তেওঁৰ ছ’চিয়েল মিডিয়া প্লেটফৰ্ম এক্সত প’ষ্টৰ জৰিয়তে দেশবাসীক স্বাধীনতা দিৱসৰ শুভেচ্ছা জ্ঞাপন কৰে৷

উপস্থিত হোৱাৰ লগে লগে প্ৰধানমন্ত্ৰীক আদৰণি জনায় কেন্দ্ৰীয় প্ৰতিৰক্ষা মন্ত্ৰী ৰাজনাথ সিং, প্ৰতিৰক্ষা ৰাজ্যিক মন্ত্ৰী সঞ্জয় ছেঠ, আৰু প্ৰতিৰক্ষা সচিব গিৰিধৰ আৰামনে। দিল্লী এলেকাৰ জেনেৰেল অফিচাৰ কমাণ্ডিং লেফটেনেণ্ট জেনেৰেল ভৱনীশ কুমাৰৰ সৈতে চিনাকি কৰাই দিয়ে প্ৰতিৰক্ষা সচিবগৰাকীয়ে।

ইয়াৰ পিছত প্ৰধানমন্ত্ৰীক চেলুটিং বেছলৈ লৈ যোৱা হয়, য’ত সেনা, বায়ুসেনা আৰু দিল্লী আৰক্ষীৰ এজনকৈ বিষয়া আৰু ২৪ জনকৈ কৰ্মীৰে গঠিত এক সংযুক্ত গাৰ্ড অৱ অনাৰে সাধাৰণ চেলুট প্ৰদান কৰে। ইয়াৰ পিছতে পি এম মোদীয়ে গাৰ্ড অৱ অনাৰ পৰিদৰ্শন কৰি দিৱসৰ অনুষ্ঠানৰ আনুষ্ঠানিক আৰম্ভণি কৰে।