গুৱাহাটীঃ স্মাৰ্ট মিটাৰৰ লুণ্ঠন আৰু শিৱসাগৰত অনা-অসমীয়াৰ অশালীন ব্যৱহাৰক লৈ বিধানসভাৰ শৰৎকালীন অধিৱেশনৰ প্ৰথম দিনটোতেই বৃহস্পতিবাৰে উত্তাল হৈ পৰে সদনৰ মজিয়া।

বিধানসভাৰ অধিৱেশন আৰম্ভ হোৱাৰ পিছতে বিৰোধীয়ে আজি শিৱসাগৰত সংঘটিত ঘটনাক লৈ সদনত পৃথক আলোচনাৰ আহ্বান জনায়। আনহাতে স্মাৰ্ট মিটাৰ প্ৰসংগত সভা স্থগিত ৰখাৰো প্ৰস্তাৱ দিয়ে বিৰোধীয়ে। কিন্তু বিধানসভাৰ অধ্যক্ষই বিৰোধীৰ এই দুয়োটা প্ৰস্তাৱেই অগ্ৰাহ্য কৰাত প্ৰতিবাদ কৰি সদন ত্যাগ কৰে বিৰোধী দলৰ কেইবাগৰাকীও বিধায়কে।

বিধানসভাত স্মাৰ্ট মিটাৰৰ প্ৰসংগ উত্থাপন কৰি সভা স্থগিত ৰখাৰ প্ৰস্তাৱ দিয়ে শিৱসাগৰৰ বিধায়ক অখিল গগৈয়ে। মুখ্যমন্ত্ৰীৰ মন্তব্যৰ আঁত ধৰি গগৈয়ে কয় যে ৰাজ্যত ব্যাপকভাৱে আইন-শৃংখলাৰ অৱনতি ঘটিছে। মুখ্যমন্ত্ৰীয়ে নিজমুখে কৈছে যে, ৰাজ্যত ২২গৰাকীৰো অধিক মহিলা-যুৱতী ধৰ্ষিতা হৈছে। গতিকে এনে পৰিস্থিতিত মুখ্যমন্ত্ৰীয়ে পদত্যাগ কৰিব লাগে।

ইফালে পুৱাৰভাগতে স্মাৰ্ট মিটাৰৰ বিৰুদ্ধে প্ৰতিবাদ সাব্যস্ত কৰিবলৈ গৈ হাতত লেম্প আৰু স্মাৰ্ট মিটাৰ লৈ বিধানসভাৰ চৌহদত উপস্থিত হয় অখিল গগৈ। লগতে সংবাদমাধ্যমৰ আগত স্মাৰ্ট মিটাৰৰ বাবে কিমান নিৰিখ বৃদ্ধি পাইছে তাৰ সন্দৰ্ভতো বিস্তৃত বিৱৰণ দাঙি ধৰে।

আনফালে বিধানসভাৰ মজিয়াত স্মাৰ্ট মিটাৰ প্ৰসংগক লৈ বিৰোধীয়ে উত্তাল পৰিৱেশ সৃষ্টি কৰাৰ সময়তে মন্ত্ৰী পীয়ুষ হাজৰিকাই মন্ত্ৰী-বিধায়কসকলৰ ঘৰতো স্মাৰ্ট মিটাৰ লগোৱা হব বুলি মন্তব্য প্ৰকাশ কৰে। মাটি কিনা-বেচাক লৈ মুখ্যমন্ত্ৰীয়ে কৰা মন্তব্যৰ বিৰোধিতাৰে বিধায়ক আমিনুল ইছলামেও আনিছিল সভা স্থগিতৰ প্ৰস্তাৱ। কিন্তু বিৰোধীৰ এই আটাইকেইটা প্ৰস্তাৱ অগ্ৰাহ্য কৰে অধ্যক্ষই।

ইফালে প্ৰতিবাদ স্বৰূপে সদন ত্যাগ কৰাৰ পিছতে সদনৰ বাহিৰত প্ৰতিবাদ সাব্যস্ত কৰে বিৰোধী বিধায়কে। এই প্ৰতিবাদত অংশ লয় অসম প্ৰদেশ কংগ্ৰেছৰ সভাপতি ভূপেন বৰা আৰু ধুবুৰীৰ বিধায়ক ৰকিবুল হুচেইনে।