অসমৰ অৰ্থনীতি মজবুত কৰিবলৈ সুৰাপায়ীসকলে বৃহৎ যোগদান দিলে৷ দুৰ্গা পূজাৰ চাৰিটা দিনত গুৱাহাটীত প্ৰায় ৩০ কোটি টকাৰ সুৰা বিক্ৰী হৈছে৷ ২০২২ চনত ১৬ কোটি ৮০ লাখ, ২০২২ চনত ২২ কোটি ৫০ লাখ টকাৰ সুৰা বিক্ৰী হৈছিল৷ এইবাৰ কেৱল ষষ্ঠীৰ দিনটোতে প্ৰায় ৮ কোটি টকাৰ সুৰা বিক্ৰীৰ কথা জানিব পৰা গৈছে৷ বাকী সপ্তমী, অষ্টমী, নৱমীত প্ৰায় ২২ কোটি টকাৰ সুৰা বিক্ৰী হৈছে৷ ২০২২ চনৰ এক তথ্য মতে, অসমত প্ৰায় ১,৭০০ অনুজ্ঞাপত্ৰযুক্ত সুৰাৰ দোকান৷ য’ত ভাৰতত নিৰ্মিত বিদেশী সুৰা বিক্ৰী কৰা হয়৷ প্ৰায় ১,০০০ খন বাৰ আছে। পাঁচশৰো অধিক দোকান আছে যিয়ে পৰম্পৰাগতভাৱে নিৰ্মিত মদ বিক্ৰী কৰে। সুৰাৰ বিক্ৰীৰ দ্বাৰা বৃহৎ পৰিমাণৰ ৰাজহ লাভ কৰে অসম চৰকাৰে৷ যাৰ বাবে চৰকাৰ গাঁৱে-ভূৱে সুৰাৰ বিপণি খোলাৰ অনুমতি প্ৰদান কৰি গৈছে। চৰকাৰী তথ্য মতে চলিত ২০২৩-২৪ বিত্তীয় বৰ্ষৰ প্ৰথম পাঁচটা মাহতে অসমত আবকাৰী ৰাজহ সংগ্ৰহ কৰিছে ১,৭১৮.৭৫ কোটি টকা। দৈনিক গড়ে ১০.৮৬ কোটি টকাৰ আবকাৰী ৰাজহ সংগ্রহ কৰে অসম চৰকাৰে। অসমৰ অৰ্থনীতিত সুৰাপায়ীসকলৰ বিশেষ ভূমিকা আছে। আনহাতে এই ভূমিকাৰ বাবেই চৰকাৰে নতুন নতুন সুৰাৰ বিপণি খোলাৰ অনুমতি দি গৈছে৷ নৱবৰ্ষ, দুৰ্গা পূজা, কালীপূজা, বিশ্বকৰ্মা, ফাকুৱা, বিহুৰ দৰে উৎসৱ-পাৰ্বনত সুৰা বিক্ৰী ক্ৰমাৎ বৃদ্ধি পাইছে।