ম্যানমানস্থিত আলফা স্বাধীনৰ শিবিৰত ড্ৰোন আৰু মিছাইল আক্ৰমণৰ ফলত তিনি আলফা নেতা শ্বহীদ হোৱাৰ খবৰে তীব্ৰ প্ৰতিক্ৰিয়াৰ সৃষ্টি কৰিছে অসমত৷ আলফা স্বাধীনৰ শিবিৰত হোৱা আক্ৰমণৰ কথা অসম চৰকাৰে অৱগত নহয় বুলি দাবী কৰিছে মুখ্যমন্ত্ৰী হিমন্ত বিশ্ব শৰ্মাই৷ মুখ্যমন্ত্ৰীৰ মন্তব্যক আজি উভতি ধৰিছে অসম প্ৰদেশ কংগ্ৰেছৰ সভাপতিগৌৰৱ গগৈয়ে৷ আলফা স্বাধীনৰ শিবিৰত হোৱা ড্ৰোন আক্ৰমণৰ ঘটনাৰ তীব্ৰ প্ৰতিবাদ জনাইছ অসম প্ৰদেশ কংগ্ৰেছৰ সভাপতি গৌৰৱ গগৈয়ে ভাৰতীয় কৰ্তৃপক্ষৰ অনুমতি বা অজ্ঞাতে এয়া সম্ভৱ নহয় বুলি দাবী কৰিছে। গৌৰৱ গগৈয়ে কয় যে এই আক্ৰমণ সন্দর্ভত ৰাজ্য চৰকাৰ আৰু কেন্দ্ৰ চৰকাৰৰ নীৰৱতা সন্দেহজনক। এনে ড্ৰোন আক্ৰমণ গৃহমন্ত্ৰী অমিত শ্বাহৰ অজ্ঞাতে হ’বই নোৱাৰে। মুখ্যমন্ত্ৰী হিমন্ত বিশ্ব শৰ্মাই নিজেই কয় যে তেওঁ পৰেশ বৰুৱাৰ সৈতে ঘনিষ্ঠ সম্বন্ধত আছে। সেয়া সত্য হ’লে, এনে নিৰ্ভুল আক্ৰমণ তেওঁৰ অজ্ঞাতে হ’ব পাৰে নে? গগৈয়ে লগতে কয় যে কিছুমানে ইয়াক ‘অপাৰেছন সিন্দুৰ’ বুলি ক’লে, কিন্তু আমাৰ বাবে এইটো অতীতৰ গোপ্তাহত্যাৰ পুনৰাবৃত্তি যেন লাগিছে – য’ত নিজৰেই অসমীয়াৰ ওপৰত লক্ষ্য কৰা হৈছিল। আলফা স্বাধীনৰ ওপৰত হোৱা সেনা আক্ৰমণত কেইবাজনো অসমীয়াৰ নিহত হোৱাৰ খবৰও প্ৰকাশ পাইছে। ইপিনে, বিধানসভাৰ বিৰোধী দলৰ নেতা দেৱব্ৰত শইকীয়াইও এই ঘটনাক লৈ গভীৰ চিন্তা প্ৰকাশ কৰে। তেওঁ ৰাজ্য আৰু কেন্দ্ৰ চৰকাৰৰ পৰা স্পষ্ট আৰু চৰকাৰী ব্যাখ্যা বিচাৰে।