অসম আৰক্ষীৰ এনকাউণ্টাৰ বিৰুদ্ধে ন্যায়ালয় কঠোৰ হোৱাৰ সময়তে আজিও ৰাজ্যত অব্যাহত আছে এনকাউণ্টাৰ৷ এইবাৰ দুৰ্ধৰ্ষ ডকাইতক এনকাউণ্টাৰ কৰিছে ৰাজ্যৰ আৰক্ষীয়ে৷ নলবাৰী আৰক্ষীয়ে ডকাইতি কাণ্ডৰ অভিযুক্ত হামিদ আলীক এনকাউণ্টাৰ কৰা বুলি জানিব পৰা গৈছে৷

আৰক্ষীৰ জিম্মাত থকা দুৰ্ধৰ্ষ হামিদক লক্ষ্য কৰি নিশা আৰক্ষীয়ে গুলী চলাবলগীয়া হৈছিল৷ মুকালমুৱা আৰক্ষীৰ জিম্মাত থকা হামিদ আলীক লৈ নিশা অভিযান চলোৱাৰ সময়তে আৰক্ষীৰ জিম্মাৰ পৰা হামিদে পলায়নৰ চেষ্টা কৰিছিল৷ যাৰ ফলত হামিদক কাবু কৰিবলৈ সোঁ ভৰিত গুলী কৰিবলগীয়া হয় বুলি আৰক্ষীয়ে দাবী কৰে। গুলীবিদ্ধ হৈ পাগলাদিয়া নৈত পৰি গৈছিল৷ পাছত আৰক্ষীয়ে গুৱাহাটী চিকিৎসা মহাবিদ্যালয়ত ভৰ্তি কৰে হামিদক। নলবাৰী আৰক্ষীৰ এজন উপ-পৰিদৰ্শক আৰু কনিষ্টবল আহত হোৱা বুলিও জানিব পৰা গৈছে৷

নলবাৰীৰ মুকালমুৱাত সংঘটিত এক ডকাইতি কাণ্ডৰ সৈতে জৰিত থকাৰ অভিযোগ আছিল হামিদৰ বিৰুদ্ধে৷ ১৯ জুলাইত মুকালমুৱাত জাকিৰ আলী নামৰ ব্যৱসায়ীৰ পৰা ১০ লাখ টকা লুটি নিছিল ডকাইতৰ দলে৷ ১৯ জুলাইৰ সন্ধিয়া জোতা-চেণ্ডেলৰ ব্যৱসায়ী জাকিৰ আলীক গুলীয়াই ১০ লাখ টকা লুটি নিয়া কাণ্ডত হামিদ জৰিত বুলি আৰক্ষীয়ে তথ্য লাভ কৰিছিল। শনিবাৰে পুৱতি নিশা সুতাৰকুছিত হামিদক
গ্ৰেপ্তাৰ কৰিছিল নলবাৰী আৰক্ষীয়ে৷