মহানগৰীৰ খানাপাৰত ২৫ আৰু ২৬ ফেব্ৰুৱাৰীত অসম চৰকাৰে অনুষ্ঠিত কৰা এডাভাণ্টেজ আছাম ২.০ বিনিয়োগ সন্মিলনৰ সফল সামৰণি পৰিছে যদিও এডাভাণ্টেজ আছাম ২.০ৰ প্ৰদৰ্শনীখন ১ মাৰ্চলৈ চলি থাকিব৷ আজি এই কথা মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যম যোগে প্ৰকাশ কৰিছে৷ মুখ্যমন্ত্ৰীয়ে আজি এই কথা ঘোষণা কৰাৰ লগতে নিজেও প্ৰদৰ্শনী পৰিদৰ্শন কৰে৷ এডভাণ্টেজ আছামৰ প্ৰদৰ্শনীত উপস্থিত হৈ মুখ্যমন্ত্ৰীয়ে প্ৰদৰ্শনীৰ বিপণীসমূহ প্ৰত্যক্ষ কৰি বিভিন্ন ক্ষেত্ৰৰ লোকৰ সৈতে কতা-বাৰ্তা পাতে৷ আগন্তুক ৩ দিনৰ বাবে প্ৰদৰ্শনী মুকলি হৈ থাকিব৷ আজি মুখ্যমন্ত্ৰীয়ে কয় যে এডভাণ্টেজ আছামৰ প্ৰদৰ্শনী সৰ্বসাধাৰণলৈ মুকলি কৰা হৈছে৷ বৃহৎ সন্মিলনখনত যিখন প্ৰদৰ্শনীয়ে সকলোকে মোহিত কৰিছিল সেইখন ১ মাৰ্চলৈ সকলোৰে বাবে মুকলি হৈছে৷ দৰ্শনাৰ্থীয়ে ৰাজ্য চৰকাৰৰ উদ্যোগৰ বিকাশ আৰু পৰিকল্পনা, দৃষ্টিভংগী প্ৰদৰ্শনীখনত অন্বেষণ কৰিব পাৰিব৷ ড০ শৰ্মাই লগতে কয় যে খানাপাৰাৰ পশু চিকিৎসা বিজ্ঞান মহাবিদ্যালয়ৰ খেলপথাৰত চলি থকা এই প্ৰদৰ্শনীখন চাবলৈ আহক৷ প্রদর্শনী অসমৰ সংস্কৃতি আৰু আগন্তুক পৰিকল্পনাৰ এক উত্তম প্ৰদৰ্শন। এই সুযোগতে যুৱ-বন্ধুসকলক প্ৰদৰ্শনীখন পৰিদৰ্শন কৰি অসমত সূচনা হোৱা পৰিৱৰ্তনৰ এক অভিজ্ঞতা ল’বলৈ অনুৰোধ জনালো।