বিগত ২৪ ঘণ্টাত ৰাজ্যত সংঘটিত ভয়ংকৰ কেইবাটাও পথ দুৰ্ঘটনাত ৭ বছৰীয়া ছাত্ৰসহ ৮গৰাকী লোকে প্ৰাণ হেৰুৱাইছে৷ কাছাৰৰ শিলচৰ-কালাইন পথত একেটা পৰিয়ালৰে ৪গৰাকী লোকসহ মুঠ ৫গৰাকী লোকে একেলগে প্ৰাণ হেৰুৱাইছে৷ আনহাতে, গোৱালপাৰাৰ কৃষ্ণাইত ৭ বছৰীয়া ছাত্ৰই প্ৰাণ হেৰুৱাইছে৷ ৰাজ্যত আজিৰ দিনটোত পৃথক পৃথক ৫টা দুৰ্ঘটনাত ৮ গৰাকী লোকে মৃত্যুক আকোৱালি লৈছে। কাছাৰ জিলাৰ শিলচৰ-কালাইন পথৰ ৰাণীঘাটত সংঘটিত শোকাৱহ পথ দুৰ্ঘটনাত একেটা পৰিয়ালৰ চাৰিগৰাকী লোকে প্ৰাণ হেৰুৱাইছে৷ ৰাণীঘাটত বলেৰ’ পিকআপ আৰু অটোৰ মাজত লগা সংঘৰ্ষ লাগে৷ তীব্ৰগতিত অহা বলেৰ’ পিকআপ ভানখনে অটোখনক খুন্দামাৰে৷ ফলত অটোখন চূচুৰ্মৈ হৈ পৰে৷ অটোখনত থকা দুগৰাকী মহিলা আৰু তিনিজন পুৰুষসহ ৫গৰাকীকৈ লোকে একেলগে প্ৰাণ হেৰুৱায়৷ এই সংঘৰ্ষত মুঠ ৫গৰাকী লোক নিহত হয় যদিও চাৰিগৰাকী লোক এটা পৰিয়ালৰে আছিল৷ স্বামী, স্ত্ৰী জাকিৰ হুছেইন, ৰেজিয়া বেগম, পুত্ৰ-কন্যা ৰেহানা বেগম আমিৰ হুছেইনৰ মৃত্যু হয়৷ শিলচৰ-কালাইন পথত দুৰ্ঘটনা সংঘটিত হোৱাৰ পাছতে উত্তপ্ত পৰিস্থিতিৰ সৃষ্টি হয়৷ স্থানীয় ৰাইজে উত্তাল প্ৰতিবাদ সাব্যস্ত কৰে। শিলচৰ-কালাইন পথত বালি-ডাম্পাৰ, বলেৰ’ পিকআপে আতংকৰ সৃষ্টি কৰি আহিছে৷ আৰক্ষীয়ে গুৰুত্ব নিদিয়াৰ ফলতে প্ৰায়ে এনে দুৰ্ঘটনা সংঘটিত হৈ আহিছে৷ ইপিনে গোৱালপাৰাৰ কৃষ্ণাইত সংঘটিত এক কৰুণ পথ দুৰ্ঘটনাত ৭ বছৰীয়া ছাত্ৰই প্ৰাণ হেৰুওৱাৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে গোৱালপাৰা জিলাত৷ জিলাখনৰ কৃষ্ণাইত শোকাৱহ পথ এটি ৭ বছৰীয়া ছাত্ৰ আৰুষ ভট্টাচাৰ্য্য নিহত হয়৷ উদণ্ড চালকে এখন ই-ৰিক্সাৰে খুন্দা মৰাত কৃষ্ণাইৰ জ্যোতিনগৰৰ তথা কৃষ্ণাই পাব্লিক স্কুলৰ ২য় শ্ৰেণীৰ ছাত্ৰ আৰুষৰ মৃত্যু হয়৷ ফলত কৃষ্ণাই অঞ্চলত শোকৰ ছাঁ পৰিছে৷ ই-ৰিক্সাৰ খুন্দাত খুন্দাত থিতাতে নিহত এটি ৭ বছৰীয়া ছাত্ৰজন। দুৰ্ঘটনাৰ পিছতে কৃষ্ণাইত উত্তপ্ত পৰিস্থিতিৰ সষ্টি হয়৷ উত্তেজিত ৰাইজে ১৭ নং ৰাষ্ট্ৰীয় ঘাইপথ অৱৰোধ কৰে৷ ৰাষ্ট্ৰীয় ঘাইপথত ই-ৰিক্সা চালকে নথিপত্ৰ অবিহনে নীতিনিয়ম নমনাকৈ ৰাষ্ট্ৰীয় ঘাইপথত চলাচল কৰাৰো অভিযোগ আনে৷ ঘটনাস্থলীত আৰক্ষী উপস্থিত হৈ পৰিস্থিতি নিয়ন্ত্ৰণ কৰিবলৈ সক্ষম হয়। অভিযোগ মতে, গোৱালপাৰা জিলাত একাংশ নীতি-নিয়ম নমনা বাহন চালকৰ তাণ্ডৱ অব্যাহত আছে৷ আৰক্ষীয়ে সময়ে সময়ে তালাচী চলাই তেনে চালকক নাকী লগাবলৈ প্ৰয়াস কৰে যদিও এবাৰ তালাচী চলাই দীৰ্ঘদিনলৈ পাহৰি থকাৰ ফলতে জিলাখনত একাংশ চালকে সন্ত্ৰাস সৃষ্টি কৰি গৈছে৷ আৰক্ষীয়ে তেনে চালকক নিয়ন্ত্ৰণ নকৰাৰ ভয়ংকৰ পৰিনাম আজি দেখা গ’ল৷ পাঠশালা, দেৰগাঁৱত দুটা পৃথক পথ দুৰ্ঘটনাত আন দুগৰাকী লোক নিহত হৈছে৷