Brahmaputra Times
আজি ৰাভা হাছং স্বায়ত্ব শাসিত পৰিষদীয় নিৰ্বাচনৰ ভোটগ্ৰহণ শান্তিৰে অনুষ্ঠিত হয়। পুৱা সাত বজাৰপৰা শান্তিপূৰ্ণভাৱে আৰম্ভ হোৱা নিৰ্বাচন বিয়লি তিনি বজাত নিৰ্ধাৰিত সময়ত সমাপ্ত হয়৷ কেবাটাও সমষ্টিৰ ভোটগ্ৰহণ কেন্দ্ৰত ৪ বজালৈ ভোটগ্ৰহণ হয়৷ ৰাভা হাছঙৰ নিৰ্বাচনৰ মুঠ ভোটাৰৰ সংখ্যা হৈছে ৪,৪৫,৫৮৬ গৰাকী। ৩৩ টা সমষ্টিত মুঠ ১১৬ গৰাকী প্ৰাৰ্থীৰ ভাগ্য বেলট কাকতৰ জৰিয়তে নিৰ্ধাৰণ হ’ব। ৩৬ গৰাকী প্ৰাৰ্থীৰ ভিতৰত তিনিগৰাকী প্ৰাৰ্থীয়ে ইতিমধ্যে বিনা প্ৰতিদ্বন্দ্বিতাৰে জয়লাভ কৰিছে৷ গোৱালপাৰা জিলাৰ জয়ৰামকুচীত বিজেপি প্ৰাৰ্থী প্ৰেমাজুলি ৰাভাই জয়লাভ কৰাৰ বিপৰীতে কামৰূপ জিলাৰ খলিহাকোঠ সমষ্টিত ৰাভা হাছং যৌথ সংগ্ৰাম সমিতিৰ প্ৰাৰ্থী নগৰমল স্বৰ্গীয়াৰী আৰু হাহিম সমষ্টিত সোণাৰাম ৰাভা জয়ী হৈছে৷ ৰাভা হাছং পৰিষদৰ মুখ্য কাৰ্যবাহী সদস্য তথা ৰাভা হাছং যৌথ সংগ্ৰাম সমিতিৰ মুখ্য আহ্বায়ক টংকেশ্বৰ ৰাভাই ভোটদান কৰাৰ আগমুহূৰ্তত দুধনৈস্থিত ঐতিহ্যমণ্ডিত মাঁ বনবাসী মন্দিৰত সপত্নীক উপস্থিত হৈ মাঁ বনবাসীৰ আশিস লৈ বালাচৰা চৰকাৰী নিম্ন বুনিয়াদী বিদ্যালয়ত নিজৰ ভোটাধিকাৰ সাব্যস্ত কৰে৷ সাংবাদিকে সোধা এক প্ৰশ্নৰ উত্তৰত টংকেশ্বৰ ৰাভাই কয় যে গণতন্ত্ৰক শক্তিশালী কৰাৰ বাবে মুকলি মন লৈ এক সুস্থ বাতাৱৰণ সৃষ্টি কৰাৰ বাবে পুৱাৰেপৰা ৰাইজে নিজৰ নিজৰ ভোটাধিকাৰ সাব্যস্ত কৰে৷
