ধাৰা ৩৭০ প্ৰত্যাহাৰ কৰাৰ পাছৰে পৰা জম্মু-কাশ্মীৰত ৰাষ্ট্ৰপতিৰ শাসন কাৰ্যকৰী কৰা হৈছিল৷ ২০১৯ চনত লোকসভা আৰু ৰাজ্যসভাত ধাৰা ৩৭০ প্ৰত্যাহাৰৰ বিধয়েক গৃহীত হোৱাৰ পাছতে জম্মু-কাশ্মীৰক দুখন পৃথক কেন্দ্ৰীয় শাসিত ৰাজ্য কৰা হয়৷ তাৰ লগতে ২০১৯ চনৰ ৩১ অক্টোবৰত ৰাষ্ট্ৰপতি শাসন কাৰ্যকৰী কৰা হৈছিল৷ তেতিয়াৰ পৰাই চৰকাৰ অবিহনে ৰাজ্যপালে চলাই আছে জম্মু-কাশ্মীৰ কেন্দ্ৰীয় শাসিত ৰাজ্যখনক৷ ৬ বছৰৰ অন্তত দেওবাৰে কেন্দ্ৰ চৰকাৰৰ গৃহ বিভাগে জাৰি কৰিছে নিৰ্দেশনা। ৰাষ্ট্ৰপতি দ্ৰৌপদী মুৰ্মু স্বাক্ষৰিত কেন্দ্ৰীয় চৰকাৰৰ অধিসূচনাত কোৱা হৈছে যে জম্মু আৰু কাশ্মীৰ পুনৰ গঠন আইন, ২০১৯ৰ অনুচ্ছেদ ৭৩ আৰু ভাৰতীয় সংবিধানৰ ২৩৯ আৰু ২৩৯-ক অনুচ্ছেদ অনুসৰি কেন্দ্ৰীয় শাসিত জম্মু-কাশ্মীৰ অঞ্চলৰ কাৰ্যকৰী পূৰ্বেৰ আদেশ জৰুৰী ভিত্তিত প্ৰত্যাহাৰ কৰা হৈছে৷ ৰাষ্ট্ৰপতি শাসন প্ৰত্যাহাৰৰ পিছতে ১৬ অক্টোবৰৰ পুৱা ১১:৩০ বজাত জম্মু-কাশ্মীৰত নতুন চৰকাৰৰ বাবে শপত গ্ৰহণ অনুষ্ঠান অনুষ্ঠিত হ’ব। জম্মু আৰু কাশ্মীৰৰ লেফটেনেণ্ট গভৰ্ণৰ মনোজ সিনহাই ইণ্ডিয়া মিত্ৰজোঁটৰ নেতা তথা বিধায়িনী দলৰ নেতা ওমৰ আব্দুল্লাক নতুন চৰকাৰ গঠন কৰিবলৈ আমন্ত্ৰণ জনাইছে। ওমৰ আব্দুল্লাত প্ৰদান কৰা পত্ৰখনত কোৱা হৈছে যে জম্মু-কাশ্মীৰ চৰকাৰ গঠন আৰু নেতৃত্ব দিবলৈ আপোনাক আমন্ত্ৰণ জনাই আনন্দিত। ওমৰ আব্দুল্লাই সোমবাৰে ছ’চিয়েল মিডিয়াত এই পত্ৰখনৰ এটা প্ৰতিলিপি শ্বেয়াৰ কৰি কয় যে এলজিৰ প্ৰধান সচিব মনোজ সিনহাক অভ্যর্থনা কৰি আনন্দিত। তেওঁ জম্মু-কাশ্মীৰত পৰৱৰ্তী চৰকাৰ গঠন কৰিবলৈ আমন্ত্ৰণ জনায়। উল্লেখ্য যে, তিনিটা পৰ্যায়ত জম্মু-কাশ্মীৰত নিৰ্বাচন অনুষ্ঠিত হৈ যোৱাৰ পাছতে ৮ অক্টোবৰত ফলাফল ঘোষণা কৰা হয়৷ ঘোষিত ফলাফল অনুসৰি কংগ্ৰেছ-নেচনেল কনফাৰেন্সে ৪৮ খন আসনত জয়ী হয়৷ পাছত আপৰ এজন বিধায়ক আৰু চাৰি নিৰ্দলীয়াই কংগ্ৰেছ-নেচনেল কনফাৰেন্সৰ জোঁটক সমৰ্থন কৰাৰ ঘোষণা কৰিছে৷ মুঠ চৰকাৰৰ পক্ষত ৫৬ জন বিধায়কৰ সমৰ্থন লাভ কৰিছে৷