গুৱাহাটী মহানগৰীত মদৰ ৰাগীত মাতাল ভাতৃৰ হাতত ভাতৃৰ প্ৰাণ যোৱাৰ ঘটনাই তীব্ৰ চাঞ্চল্যৰ সৃষ্টি কৰিছে৷ মহানগৰীৰ বিৰুবাৰীত সুৰাৰ ৰাগীত মাতাল ভাতৃয়ে ছুৰীৰে হানি ভাতৃক হত্যা কৰিছে৷ নিহত লোকজন হৈছে শংকৰ সৰকাৰ৷ ভাতৃ হত্যাৰ অভিযুক্ত বিশ্বজিৎ সৰকাৰক গ্ৰেপ্তাৰ কৰিবলৈ সক্ষম হৈছে গুৱাহাটী আৰক্ষী৷ কালি নিশা প্ৰায় ১০ বজাত বিৰুবাৰীৰ বিশ্বজিৎ সৰকাৰে মদ্যপান কৰি ঘৰলৈ আহে৷ বিশ্বজিৎ সৰকাৰে মদ্যপান কৰি আহি ভাতৃ শংকৰ সৰকাৰৰ সৈতে বাক-বিতণ্ডাত লিপ্ত হয়৷ প্ৰথমে তৰ্কা-তৰ্কি তাৰ পাছতে আক্ৰমণ-প্ৰত্যাক্ৰমতণ লিপ্ত হয় যদিও খঙত অগ্নিশৰ্মা হৈ সুৰাসক্ত বিশ্বজিৎ সৰকাৰে ভাতৃ শংকৰ সৰকাৰৰ ডিঙি আৰু পেটত ছুৰীৰে উপৰ্যুপৰি আক্ৰমণ কৰে। ফলত অত্যাধিক ৰক্তক্ষৰণ হৈ ঢলি পৰে শংকৰ সৰকাৰ৷ সংকটজনক অৱস্থাত পৰিয়ালে ততাতয়াকৈ গুৱাহাটী চিকিৎসা মহাবিদ্যালয়ত ভৰ্তি কৰে যদিও শংকৰক মৃত ঘোষণা কৰে চিকিৎসকে। ঘটনা সংঘটিত কৰিয পলায়ন কৰা বিশ্বজিৎ সৰকাৰক পল্টন বজাৰ আৰক্ষীয়ে গ্ৰেপ্তাৰ কৰিবলৈ সক্ষম হয়৷ আৰক্ষীয়ে ঘটনাৰ তদন্ত আৰম্ভ কৰিছে৷