মহাৰাষ্ট্ৰত বিধানসভা নিৰ্বাচনৰ প্ৰচাৰৰ শেষ দিনটোত এগৰাকী জ্যেষ্ঠ নেতাক শিল নিক্ষেপ কৰি আহত কৰাৰ ঘটনাই তীব্ৰ চাঞ্চল্যৰ সৃষ্টি হৈছে৷ মহাৰাষ্ট্ৰৰ প্ৰাক্তন গৃহ মন্ত্ৰী তথা এনচিপি শৰদ গোটৰ নেতা অনিল দেশমুখক সোমবাৰে নিশা নাগপুৰৰ কাটোল বিধানসভা সমষ্টিত আক্ৰমণ কৰা হয়। অচিনাক্ত দুৰ্বৃত্তই শিল দলিয়াই গাড়ীৰ গ্লাছ ভাঙি পেলোৱাৰ লগতে কেইবাটাও শিল অনিল দেশমুখৰ মূৰত আঘাত কৰিছিল৷ মূৰেৰে ৰক্ত প্ৰৱাহিত হোৱাত গুৰুতৰভাৱে আঘাতপ্ৰাপ্ত হয় নেতাগৰাকী। এটা ভিডিঅ’ত তেওঁৰ মূৰৰ পৰা তেজ বৈ থকা দেখা গৈছে। টাৱেলেৰে মূৰ বান্ধি ৰখা দেখা আছে। কংগ্ৰেছ নেতা বালাচাহেব থোৰাটে এই আক্ৰমণক গৰিহণা দি কয় যে উপ-মুখ্যমন্ত্ৰী দেৱেন্দ্ৰ ফাড়ণবীছৰ জিলাত এজন প্ৰাক্তন গৃহমন্ত্ৰীৰ ওপৰত হোৱা আক্ৰমণে ৰাজ্যখনত আইনৰ শাসন চলিছে নে গুণ্ডাৰ শাসন চলিছে বুলি প্ৰশ্ন উত্থাপন কৰিছে? বিজেপিয়ে অভিযোগ কৰিছে যে এয়া নিৰ্বাচনী ষ্টাণ্ট। কাটোল বিধানসভা সমষ্টিৰ বিজেপি নেতা অবিনাশ ঠাকৰেয়ে দেশমুখে নিজৰ কৰ্মীসকলৰ দ্বাৰা শিল নিক্ষেপ কৰাইছে বুলি দাবী কৰে। অনিল দেশমুখৰ পুত্ৰ সলিল কাটোল বিধানসভা সমষ্টিৰ এনচিপি শাৰদ গোটৰ প্ৰাৰ্থী। প্ৰচাৰৰ অন্তিম দিনটোত দেশমুখে গোটেই দিনটো অঞ্চলটোত প্ৰচাৰ চলাইছিল। শেষ সভা নাৰখেদ নামৰ ঠাইত আছিল। সভাশেষ হোৱাৰ পিছতে তেওঁ কৰ্মীৰ সৈতে এখন গাড়ীত কাটোললৈ ৰাওনা হোৱাত বেলা ফাটা নামৰ ঠাইত কিছুমান অচিনাক্ত লোকে গাড়ীত শিল নিক্ষেপ কৰে।