শেহতীয়াকৈ কংগ্ৰেছ দলক তীব্ৰ সমালোচনা কৰি গৈছে ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে৷ বিহালী সমষ্টি এৰি নিদিয়াৰ অচিলাৰে অখিল গগৈয়ে ‘একলা চলৌ’ নীতি অৱলম্বন কৰিছে৷ বিজেপিৰ পৰিৱৰ্তে কংগ্ৰেছক ক্ষতি কৰিবলৈ অখিলে মাইনৰিটি বেল্টত ব্যাপক সভা-সমিতি পাতি গৈছে৷ উত্তৰ অসম, মধ্য অসম আৰু নামনি অসমত বিজেপিক লাভান্বিত কৰিবলৈ মাইনৰিটি বেল্টত প্ৰচাৰ চলোৱাত বিভিন্নজনে অখিল গগৈক সন্দেহৰ চকুৰে চাইছে৷ বিজেপিক সহায় কৰিবলৈ নামনিত মাইনৰিটি ভোটক বিভাজিত কৰি ২০২৬ চনৰ নিৰ্বাচনত কংগ্ৰেছৰ সমানে সমানে প্ৰাৰ্থী থিয় কৰাবলৈ ব্লুপ্ৰিণ্ট ৰচাৰ অভিযোগৰ মাজতে আজি অখিল গগৈৰ প্ৰতি আস্থা প্ৰকাশ কৰিছে কংগ্ৰেছীৰ বিসম্বাদী তথা নিলম্বিত বিধায়ক শ্বেৰমান আলী আহমেদে৷ অখিল গগৈয়ে গোপনে নামনি অসমত একাংশ ধুৰন্ধৰ সংখ্যালঘূ নেতাক লৈ কংগ্ৰেছক ক্ষতি কৰিবলৈ জাল পেলোৱা বুলি অভিযেগাৰ মাজতে শ্বেৰমান আলী আহমেদৰ দৰে কংগ্ৰেছৰ বিসম্বাদী নেতাই অখিল গগৈৰ সৈতে মন্ত্ৰী হোৱাৰ কথা অকপটে স্বাকীৰ কৰিছে৷ নিজ সমষ্টি বাঘবৰত অনুষ্ঠিত এখন ৰাজহুৱা সভাত নিলম্বিত কংগ্ৰেছী বিধায়কজন মুকলিকৈ অখিল গগৈক সমৰ্থন কৰে৷ ২০২৬ চনত ৰাইজৰ দল চৰকাৰৰ অংশীদাৰ হ’লেই শ্বেৰমান আলী আহমেদ মন্ত্ৰী হ’ব বুলি দাবী কৰিছে। ইমানে নহয় শ্বেৰমানক কি বিভাগ লাগিব সেই কথাও কৈ দিছে অখিল গগৈক৷ জলসম্পদ, ৰাজহ বিভাগৰ মন্ত্ৰী হোৱাৰ ইচ্ছা প্ৰকাশ কৰি শ্বেৰমানে কয় যে মই এই দুটা বিভাগৰ মন্ত্ৰী হোৱাৰ কথা অখিল গগৈক জনাই দিছো। মোক শিক্ষা অথবা গড়কাপ্তানি বিভাগৰ প্ৰস্তাৱ দিছিল অখিল গগৈয়ে। কিন্তু জলসম্পদ আৰু ৰাজহ বিভাগৰ মন্ত্ৰিত্ব লাগিব। লগতে ২০২৬ চনৰ নতুন চৰকাৰৰ অংশীদাৰ যদি ৰাইজৰ দল হয় তেন্তে ৰাইজৰ দলে দুজন মন্ত্ৰী বিচাৰিব। অখিল গগৈ আৰু শ্বেৰমান আলী ৰাইজৰ দলৰ কোটাৰ পৰা মন্ত্ৰী হ’ব। এই কথাও শ্বেৰমানে জনাই দিছে অখিল গগৈক। ইপিনে শ্বেৰমান আলী আহমেদৰ মন্তব্যৰ পিছতে নামনি অসমত সংখ্যালঘূ এলেকাত তীব্ৰ প্ৰতিক্ৰিয়াৰ লাভ কৰিছে৷ কিয়নো মুখ্যমন্ত্ৰীক হিমন্ত বিশ্ব শৰ্মাৰ ৰাজনীতিক সহায় কৰিবলৈ সময়ে সময়ে বিতৰ্কিত মন্তব্য দি আহিছে শ্বেৰমান আলীয়ে৷ সংখ্যালঘূক আক্ৰমণ কৰিবলৈ সুবিধা দি লাঞ্চিত কৰি আহিছে শ্বেৰমানে৷ কলাক্ষেত্ৰত মিঞা মিউজিয়াম খুলি লুঙী সংৰক্ষণ কৰিবলৈ দাবী জনাই অসমৰ সংখ্যালঘূ সমাজক অপমান কৰিবলৈ সুবিধা দিছিল এইজন শ্বেৰমানে৷ সেইজন শ্বেৰমানৰ মুখত এতিয়া অখিল গগৈৰ নাম৷ তলে তলে সঁচাকৈয়ে অখিল গগৈয়ে কংগ্ৰেছৰ বিৰোধীসকলৰ সৈতে হাত মিলাই বিজেপিক সহায় কৰিব খুজিছে নেকি? কংগ্ৰেছৰ শত্ৰু মানেই এতিয়া অখিল গগৈৰ মিত্ৰ নেকি? বিজেপিক সহায় কৰিবলে যিকোনো পৰ্যায়লৈ যাব নেকি অখিল গগৈ? এনে কথা এতিয়া নামনি অসমত চৰ্চা হ’ব ধৰিছে৷ ইপিনে শ্বেৰমান আলীক প্ৰত্যুত্তৰ দিছে ৰাইজৰ দলৰ কাৰ্যকৰী সভাপতি ভাস্ক’ ডি শইকীয়াই৷ ভাস্ক’ ডি শইকীয়াই কয় যে শ্বেৰমান আলীৰ দৰে সাম্প্ৰদায়িক, নিজ দলক বিশ্বাসঘাতকতা কৰা, হিমন্ত বিশ্ব শৰ্মাৰ ভৃত্যৰ ৰাইজৰ দলত স্থান নাই৷