অসমৰ বজাৰত প্ৰতিকেজি পিঁয়াজ ৮০ৰ পৰা ৯০ টকাকৈ বিক্ৰী হৈছে৷ আলু প্ৰতিকেজি ৪০ৰ পৰা ৫০ টকা, নহৰু প্ৰতিকেজি ৪০০ টকা, আদা প্ৰতিকেজি ৩০০ টকা, গাজৰ প্ৰতি কেজি ১২০ টকাত কিনি খাবলগীয়া হৈছে মানুহে৷ ৰাজ্যৰ বজাৰত চৰকাৰ, প্ৰশাসনৰ কোনো নিয়ন্ত্ৰণ নাই নথকাত যিয়ে যেনেকৈ পাৰিছে তেনেকৈ খাদ্য-সামগ্ৰী বিক্ৰী কৰি গৈছে৷ খাদ্য-সামগ্ৰীৰ দাম ৰোধ কৰাত চৰকাৰ বিফল হোৱাত প্ৰতিবাদ কৰি গৈছে সদৌ অসম ছাত্ৰ সন্থাই৷ ১১ নৱেম্বৰত সদৌ অসম ছাত্ৰ সন্তাৰ প্ৰতিখন আঞ্চলি সমিতিয়ে যোগান মন্ত্ৰী ৰণজিৎ দাসৰ পুত্তলিকা দাহ কৰি উত্তাল প্ৰতিবাদ সাব্যস্ত কৰিছিল৷ এইবাৰ কাইলৈ অৰ্থাৎ ২০ নৱেম্বৰত প্ৰতিখন জিলা সদৰত মূল্যবৃদ্ধিৰ বিৰুদ্ধে আছুৱে বিক্ষোভ প্ৰদৰ্শন কৰিব৷ আঞ্চলিক সমিতিৰ পৰা অহা সমৰ্থক, নেতা-কৰ্মীয়ে জিলা সদৰত প্ৰতিবাদ সাব্যস্ত কৰি দাম কমোৱাৰ দাবী জনাব৷ ৯ নৱেম্বৰত আছুৱে গুৱাহাটী বিশ্ববিদ্যালয়ৰ চৌহদস্থিত মুখ্য কাৰ্যালয়ত অনুষ্ঠিত কাৰ্যনিৰ্বাহকত মূল্যবৃদ্ধিৰ বিৰুদ্ধে প্ৰতিবাদ সাব্যস্ত কৰাৰ সিদ্ধান্ত লৈছিল৷ কাৰ্যনিৰ্বাহকত আছুৱে মূল্যবৃদ্ধিৰ বিৰুদ্ধে ততা বিজেপি চৰকাৰৰ বিৰুদ্ধে ১১ নৱেম্বৰ আৰু ২০ নৱেম্বৰত প্ৰতিবাদ কৰাৰ সিদ্ধান্ত লৈছিল৷