অসম কংগ্ৰেছত ফেন ক্লাৱ সংস্কৃতি নিষিদ্ধ হ’ব৷ ফেন ক্লাৱ সংস্কৃতিক লৈ ৰাজ্যিক কংগ্ৰেছৰ কেইবাগৰাকী জ্যেষ্ঠ নেতা নাৰাজ হৈ পৰিছে৷ ফেন ক্লাৱক লৈ কেৱল চৰ্চাই নহয়, দলৰ ৰাজনৈতিক পৰিক্ৰমা বিভাগৰ বৈঠকত এই বিষয়টো চৰ্চা হয়৷ কংগ্ৰেছৰ তত্বাৱধায়ক জীতেন্দ্ৰ সিঙৰ উপস্থিতিত গুৱাহাটী ৰাজীৱ ভৱনত অনুষ্ঠিত কংগ্ৰেছৰ ৰাজনৈতিক পৰিক্ৰমা সমিতিৰ বৈঠকত কংগ্ৰেছৰ নেতাৰ নামত চলাই থকা ফেন ক্লাৱক লৈ চৰ্চা কৰাৰ খবৰ পোৱা গৈছে৷ প্ৰাক্তন কেন্দ্ৰীয় মন্ত্ৰী তথা কংগ্ৰেছৰ জ্যেষ্ঠ নেতা পৱন সিং ঘাটোৱাৰে ৰাজনৈতিক পৰিক্ৰমা সমিতিৰ বৈঠকত ফেন ক্লাৱ সংস্কৃতিয়ে দলক ক্ষতি কৰাৰ অভিযোগ আনে৷ নেতাৰ ফেন ক্লাৱ চলোৱা নেতাসকলে দলতকৈ নেতাক গুৰুত্ব দি দলৰ ক্ষতি কৰাৰ অভিযোগ উত্থাপন কৰি নেতাৰ নামত ফেন ক্লাৱ চলোৱা নেতাসকলক দলত পদবী নিদিবলৈ দাবী উত্থাপন কৰিছে পৱন সিং ঘাটোৱাৰে৷ জানিব পৰা মতে, অসম প্ৰদেশ কংগ্ৰেছৰ সভাপতি ভূপেন কুমাৰ বৰা, গৌৰৱ গগৈৰো ফেন ক্লাৱ আছে বুলি জানিব পৰা গৈছে৷ ফেন ক্লাৱে নিজ নিজ নেতাৰ বিভিন্ন সমলসমূহ ফেচবুকৰ ফেজ, গ্ৰুপ, হোৱাটএছএপ গ্ৰুপ আদি প্ৰচাৰ কৰে৷ গৌৰৱ গগৈৰ ফেন ক্লাৱে বৰ্ষপূৰ্তিৰ দিন বিশেষভাৱে পালন কৰে৷ কাৰ্যসূচীত খোদ গৌৰৱ গগৈ উপস্থিত থাকে৷ তাৰ মাজতে কংগ্ৰেছত ফেন ক্লাৱ সংস্কৃতি নিষিদ্ধ কৰাৰ বাতৰিয়ে বিশেষ চৰ্চা লাভ কৰিছে৷ ৰাজ্যিক কংগ্ৰেছৰ নেতাসকলৰ ফেন ক্লাৱ বন্ধ হ’ব নে নাই তাকে লৈ এই পৰ্যন্ত কংগ্ৰেছে আনুষ্ঠানিক ঘোষণা দিয়া হয়৷