দেশৰ আঞ্চলিক দল তৃণমূল কংগ্ৰেছ, সমাজবাদী পাৰ্টি, ঝাৰখণ্ড মুক্তি মৰ্চা আদি আঞ্চলিক দলে বিৰোধ কৰাৰ সময়তে ‘এক দেশ এক নিৰ্বাচন’ক সমৰ্থন কৰিছে অসম গণ পৰিষদে৷ অসম গণ পৰিষদৰ নেতা তথা কাৰ্যকৰী সভাপতি কেশৱ মহন্তই আজি কয় যে দেশত জৰুৰীকালীন অৱস্থা প্ৰৱৰ্তন কৰা কংগ্ৰেছে ‘এক দেশ এক নিৰ্বাচন’ৰ বিৰোধিতা কৰাটো ডাঙৰ কথা নহয়৷ ‘এক দেশ এক নিৰ্বাচন’ ব্যৱস্থাৰ বাবে ৫ বছৰৰ মূৰত একেলগে বিধানসভা আৰু লোকসভাৰ সদস্যৰ বাবে ভোট দিব পাৰিব দেশৰ জনগণে। ইপিনে এক দেশ এক নিৰ্বাচন ব্যৱস্থাক সমৰ্থন কৰা অগপৰ একমাত্ৰ বৰপেটা লোকসভা সমষ্টিৰ সাংসদ ফণীভূষণ চৌধুৰীয়ে সদনত বিল উত্থাপনৰ সমৰ্থনত ভোটেই নিদিলে৷ গুৱাহাটীৰ পৰা বিমান যাত্ৰা বিলম্ব হোৱাত সাংসদ চৌধুৰীয়ে ভোট দিব নোৱাৰিলে৷ এই সন্দৰ্ভত প্ৰতিক্ৰিয়া প্ৰকাশ কৰি চৌধুৰীয়ে কয় যে মোৰ বিমান আছিল ৭ বাজি ২০ মিনিটত৷ কিন্তু বিমানৰ যাত্ৰা আৰম্ভ হৈছিল ১০ বজাৰ পিছত৷ লগতে এক দেশ এক নিৰ্বাচন সন্দৰ্ভত দলে বিবেচিত কৰিব আৰু এয়া হোৱাটো উচিত বুলিও কয় চৌধুৰীয়ে৷ লোকসভাত ‘এক দেশ এক নিৰ্বাচন’ বিধেয়ক উত্থাপনৰ সময়ত উপস্থিত নাথাকিল চৌধুৰী। কেশৱ মহন্তই এই বিধেয়ক আৰু এক দেশ এক নিৰ্বাচন ব্যৱস্থাৰ প্ৰতি সমৰ্থন আগবঢ়ায়৷ ইপিনে নিজ দলৰ সাংসদে ভোটদান নকৰা কথাটোৱে অগপৰ স্থিতিক লৈ সন্দেহৰ ৱাতাবৰণ সৃষ্টি হৈছে৷ বিজেপিৰ সৈতে মিত্ৰতাত থাকি অসমৰ চৰকাৰ চলাই থকা দলটোৱে বিজেপিৰ কোৰ এজেণ্ডা এক দেশ এক নিৰ্বাচন ব্যৱস্থাক পূৰ্ণ সমৰ্থন কৰা বুলি ক’লেও লোকসভাত তেওঁলোকৰ একমাত্ৰ সাংসদজনে উপস্থিত নথকা বিষয়টোক লৈ বিজেপি দলৰ ভিতৰচ’ৰাত ব্যাপক চৰ্চা হৈছে বুলি জানিব পাৰ গৈছে৷