গুৱাহাটীৰ ভাৰতীয় প্ৰযুক্তিবিদ্যা প্ৰতিষ্ঠানক (আইআইটি) আয়োজিত ‘থিংক ইণ্ডিয়া নৰ্থ-ইষ্ট ছামিট ২০২৫’ত কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে দেশৰ যুৱশক্তিক ৰাষ্ট্ৰ নিৰ্মাণৰ যাত্ৰাত অগ্ৰণী ভূমিকা ল’বলৈ আহ্বান জনায়। এই সমাৰোহত উত্তৰ-পূৰ্বাঞ্চলৰ বিভিন্ন শিক্ষানুষ্ঠানৰ প্ৰায় হাজাৰাধিক ছাত্ৰ-ছাত্ৰী, উদ্যোগী আৰু বিষয়াই অংশগ্ৰহণ কৰে।

যুৱশক্তিৰ শক্তিক কেন্দ্ৰত ৰাখি ৰাষ্ট্ৰীয় উন্নয়ন

মন্ত্ৰী সোণোৱালে ভাষণত কয়, “যুৱশক্তিয়েই আমাৰ দেশৰ চালিকাশক্তি। প্ৰধানমন্ত্ৰী নৰেন্দ্ৰ মোদীজীৰ নেতৃত্বত দেশৰ যুৱসমাজক দক্ষতাসম্পন্ন আৰু স্বাৱলম্বী কৰি গঢ়ি তোলাৰ ওপৰত গুৰুত্ব দিয়া হৈছে। অসম আৰু উত্তৰ-পূৰ্বাঞ্চলৰ যুৱক-যুৱতীসকলে এতিয়া মেধা আৰু যোগ্যতাৰ ভিত্তিত জাতীয় আৰু আন্তঃৰাষ্ট্ৰীয় প্ৰতিযোগিতাত স্বাক্ষৰ কৰিব পাৰিছে। ‘এক ভাৰত, শ্ৰেষ্ঠ ভাৰত’ৰ ধাৰণাৰে আগবাঢ়ি এখন আত্মনিৰ্ভৰশীল ভাৰত গঢ়াত তেওঁলোকৰ ভূমিকা অপৰিহাৰ্য্য।”

উত্তৰ-পূৰ্বাঞ্চলৰ পৰিৱৰ্তন আৰু ‘এক্ট ইষ্ট প’লিচী’

বিগত দশকত অঞ্চলটোৰ অগ্ৰগতিৰ কথা উল্লেখ কৰি সোণোৱালে কয়, “কংগ্ৰেছ চৰকাৰে ‘লুক ইষ্ট প’লিচী’ৰ নামত অঞ্চলটোক উপেক্ষা কৰিছিল। কিন্তু মোদীজীৰ ‘এক্ট ইষ্ট প’লিচী’ৰ জৰিয়তে উত্তৰ-পূৰ্বাঞ্চলক বিকাশৰ মূল সোঁতত অন্তৰ্ভুক্ত কৰা হৈছে। প্ৰধানমন্ত্ৰীয়ে নিজে ৭০ বাৰতকৈও অধিক বাৰ এই অঞ্চল ভ্ৰমণ কৰি নীতিসমূহ কাৰ্যকৰী কৰিছে। বৰ্তমান বিশ্বৰ যিকোনো ফ’ৰামত ভাৰতৰ স্থান সন্মানজনক, আৰু ইয়াৰ প্ৰভাৱ বিশ্বৰ গুৰুত্বপূৰ্ণ সিদ্ধান্তত স্পষ্ট।”

সামুদ্ৰিক খণ্ডত ভাৰতৰ উল্লংঘনীয় অগ্ৰগতি

বন্দৰ আৰু জলপথ মন্ত্ৰালয়ৰ সাফল্যৰ কথা কৈ তেওঁ উল্লেখ কৰে, “২০২৪-২৫ বৰ্ষৰ অৰ্থনৈতিক সমীক্ষামতে, আমাৰ মন্ত্ৰালয়ে আন্তঃগাঁথনি খণ্ডত শীৰ্ষ স্থান লাভ কৰিছে। বন্দৰসমূহৰ কাৰ্যক্ষমতা বৃদ্ধি, জলপথৰ বিকাশ আৰু সামুদ্ৰিক ক্ষেত্ৰত ভাৰতক বিশ্বৰ শীৰ্ষ ১০খন ৰাষ্ট্ৰৰ ভিতৰত স্থান দিয়াটো আমাৰ লক্ষ্য। পানীসম্পদক সম্পদলৈ ৰূপান্তৰিত কৰি এই খণ্ডই দেশৰ অৰ্থনীতিক শক্তিশালী কৰি তুলিব।”

যুৱকক পৰম্পৰা আৰু আধুনিকতাৰ সমন্বয়ৰ আহ্বান

সোণোৱালে যুৱপ্ৰজন্মক বিজ্ঞান-প্ৰযুক্তিৰ লগতে ভাৰতীয় সংস্কৃতি আৰু মূল্যবোধৰ প্ৰতি সচেতন হ’বলৈ পৰামৰ্শ দিয়ে। তেওঁ কয়, “ৰূপকোঁৱৰ জ্যোতিপ্ৰসাদ আগৰৱালাৰ দৰে কঠোৰ পৰিশ্ৰম আৰু মেধাৰে বিশ্বজয় কৰিব লাগে। এয়া সময় আমাৰ শিপা আৰু প্ৰগতিৰ মাজৰ সমতা ৰক্ষা কৰাৰ।”

কাৰ্যসূচীৰ অন্তত ছাত্ৰ-ছাত্ৰীসকলৰ সৈতে হোৱা সংলাপত সোণোৱালে জলপথ, বন্দৰ আৰু নৌ-খণ্ডৰ সম্ভাৱনাৰ বিষয়ে স্পষ্টীকৰণ আগবঢ়ায়। তেওঁৰ মতে, “উত্তৰ-পূৰ্বাঞ্চলৰ যুৱকসকলে এই খণ্ডত কৰ্মসংস্থান আৰু উদ্যমী হোৱাৰ সুবিধা লাভ কৰিব পাৰে।” এই অনুষ্ঠানে অঞ্চলটোৰ যুৱশক্তিৰ মাজত ৰাষ্ট্ৰপ্ৰেম আৰু নেতৃত্বৰ মনোবল জাগ্ৰত কৰাৰ লক্ষ্য আগবঢ়াইছে। “থিংক ইণ্ডিয়া”ৰ ধাৰণাক বাস্তৱ ৰূপ দিয়াৰ প্ৰয়াসত সোণোৱালে সকলোকে একগোট হৈ কাম কৰিবলৈ আহ্বান জনায়।