বিজেপিৰ সহযোগী অসমৰ আঞ্চলিক ৰাজনৈতিক দল অসম গণ পৰিষদৰ হঠাতে তৎপৰ হৈছে৷ দলটোৰ সভাপতি অতুল বৰাৰ অধ্যক্ষতাত আমবাৰীস্থিত মুখ্য কাৰ্যালয়ত ৰাজ্যিক বিষয়-ববীয়াৰ উপস্থিতিত বৰ্ধিত কাৰ্যনিৰ্বাহক অনুষ্ঠিত হয়৷ কাৰ্যনিৰ্বাহকত সাংগঠনিক দিশ, আগন্তুক পঞ্চায়ত নিৰ্বাচন আৰু ৰাভা হাচং স্বায়ত্ব শাসিত পৰিষদৰ নিৰ্বাচনক লৈ আলোচনা কৰা বুলি জানিব পৰা গৈছে৷ পঞ্চায়ত নিৰ্বাচনক লৈ সভাপতি অতুল বৰাই সকলো প্ৰকাৰৰ নেতা-কৰ্মীক সাজু হ’বলৈ নিৰ্দেশ দিয়ে৷ লগতে নিজ নিজ বুথ সমিতি শক্তিশালী কৰিবলৈ আহ্বান জনায়৷ সংবাদমাধ্যমৰ সন্মুখত অতুল বৰাই কয় যে ২০২৬ চনৰ বিধানসভা নিৰ্বাচনৰ পূৰ্বে ২০২৫ চনক ফাইনেল হিচাপে লৈ আগবাঢ়িছে অসম গণ পৰিষদ দল৷ ২০২৫ চনত অনুষ্ঠিত হ’বলগীয়া পঞ্চায়ত নিৰ্বাচন, কেইবাখনো স্বায়ত্ব শাসিত পৰিষদৰ নিৰ্বাচনৰ পিছতে ২০২৬ চনত অনুষ্ঠিত হ’ব অসম বিধানসভাৰ নিৰ্বাচন৷ যদি ২০২৫ চনত ভাল ফলাফল দেখুৱাব পাৰে তেন্তে ২০২৬ চনত আগপৰ বাবে আশাৰ বতৰা হ’ব৷ কিয়নো মাথো ৮টা বিধায়ক থকা অসম গণ পৰিষদে মিত্ৰদল বিজেপিৰ পৰা বেছি আসন দাবী কৰিব পাৰিব৷ আজি সভাপতি অতুল বৰাই কয় যে এতিয়া যিবোৰ নিৰ্বাচন আহি আহিছে সেইবোৰ ছেমিফাইনেল৷ ২০১৬ চনতহে ফাইনেল৷ আমি ২০২৫ চনত মাৰ্চ মাহত আছো৷ কেইটামান মাহ যোৱাৰ পিছতে ২০২৬ চনত পাব৷ সেই বাবে নিত্যান্তই এই বছৰটো আমাৰ বাবে গুৰুত্বপূৰ্ণ৷ আমাৰ দললৈ নতুন মানুহ আহিছে আৰু বহু মানুহ আহিব৷ নতুন প্ৰজন্মৰ যুৱক-যুৱতী, শিক্ষানুষ্ঠানৰ ছাত্ৰ-ছাত্ৰী অংশ লৈছে৷ এইটো আমাৰ কাৰণে আশাৰ বতৰা৷ আজি বৰ্ধিত কাৰ্যনিৰ্বাহকত মিত্ৰজোঁটৰ বিগ ব্ৰাডাৰ বিজেপিৰ ৰাজ্যিক সভাপতি দিলীপ শইকীয়া উপস্থিত থকা দেখা যায়৷ দিলীপ শইকীয়াই কয় যে এনডিএৰ মিত্ৰতাৰ ভিতৰৰ দলসমূহৰ ভিতৰত বিজেপিৰ বাবে অগপ আটাইতকৈ বিশ্বাসযোগ্য মিত্ৰদল৷ এই মিত্ৰতা ভংগ নহয়৷ মই সংবাদমাধ্যমক মছলা দিবলৈ এই কথা কোৱা নাই৷ এই কথা এই কাৰণেই কৈছো যে আমাৰ একাত্মতাৰ ভাৱ আৰু বৃদ্ধি পায় তাৰ বাবেহে কৈছো৷ এই মিত্ৰতা আমি কেৱল নেতাৰ মাজতে সীমাৱদ্ধতা নাৰাখি, তৃণমূল পৰ্যায়ৰ নেতাৰ তাৰ বাবে কালেক্টিভ চিন্তা কৰিব লাগিব৷ বিজেপিৰ মিত্ৰতা থুনুকা মিত্ৰতা নহয়৷ কোনোবাই যদি ভাবিছে থুনুকা মিত্ৰতা, এনেকৈ কৈ নেৰিটিভ সৃষ্টি কৰিব সেই পলিটিকেল নেৰেটিভে অগপ আৰু বিজেপিক চুব নোৱাৰে৷ মিত্ৰতা আছিল আৰু থাকিব৷ দিলীপ শইকীয়া আমবাৰীৰ কাৰ্যালয়ত থকাৰ সময়তে সংবাদমাধ্যমৰ সৈতে বাৰ্তালাপ কৰি কমলপুৰৰ প্ৰাক্তন বিধায়ক তথা অগপৰ জ্যেষ্ঠ নেতা সত্যব্ৰত কলিতাই কমলপুৰ সমষ্টিত নিৰ্বাচন খেলিম বুলি স্পষ্ট কৰে৷ বিজেপিৰ দখলত থকা কমলপুৰ সমষ্টিত পূৰ্বৰে পৰা নিৰ্বাচন খেলিবলৈ সাজু বুলি হুংকাৰ দি আহিছে সত্যব্ৰত কলিতাই৷ তাৰ মাজতে আজি বৰ্ধিত কাৰ্যনিৰ্বাহকৰ মাজতে সত্যব্ৰত কলিতাই কয় যে মই কেৱল আমাৰ দলৰ সভাপতিৰ হুছেইলটোৰ বাবে ৰৈ আছো৷ মই কেতিয়াবাৰ পৰা সাজু হৈ আছো৷ কেৱল সভাপতিৰ হুছেইলৰ বাবে অপেক্ষাৰত৷