সাংবাদিক দিলোৱাৰ হুছেইন মজুমদাৰক গ্ৰেপ্তাৰ কৰা কাৰ্যৰ বিৰোধিতা কৰিছে সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্যই৷ সাংবাদিকগৰাকীক গ্ৰেপ্তাৰ কৰা কাৰ্যত তীব্ৰ নিন্দা আৰু গহিৰণা দিছে মুখ্য উপদেষ্টাগৰাকীয়ে৷ লগতে আজি গুৱাহাটী প্ৰেছ ক্লাৱৰ উদ্যোগত প্ৰতিবাদ সাব্যস্ত কৰাত সাংবাদিকৰ গাত আৰক্ষীয়ে হাত দিয়া কাৰ্যৰ বিৰোধিতা কৰিছে ড০ সমুজ্জ্বল কুমাৰ ভট্টাচাৰ্যই৷ এক্সত এটা পোষ্ট দি সমুজ্জ্বল কুমাৰ ভট্টাচাৰ্যই কয় যে সাংবাদিক দিলোৱাৰ হুছেইন মজুমদাৰক আৰক্ষীয়ে আটক কৰা কাৰ্য‍্যক তীব্ৰ গৰিহণা জনাইছো। এই আটকৰ প্ৰতিবাদ জনাবলৈ যাওঁতে আৰক্ষীয়ে গুৱাহাটী প্ৰেছ ক্লাৱৰ বিষয়-ববীয়া আৰু আৰু সাংবাদিকসকলক চলোৱা নিৰ্য‍াতন নিত‍্যান্তই গৰ্হিত। ই গণতন্ত্ৰৰ চতুৰ্থ স্তম্ভৰ স্বাধীনতাত আঘাত হানিছে। আনহাতে সদৌ অসম ছাত্ৰ সন্থাৰ সভাপতি উৎপল শৰ্মায়ো সাংবাকিগৰাকীক গ্ৰেপ্তাৰত তীব্ৰ ক্ষোভ ব্যক্ত কৰিছে৷ উৎপল শৰ্মাই কয় যে সাংবাদিক গ্ৰেপ্তাৰ কৰি চৰকাৰ যে অসহিষ্ণু হৈছে তাৰ প্ৰমাণ দিছে। চৰকাৰখনে সাংবাদিকৰ পৰা এতিয়া মাত্ৰ দুটা শব্দই শুনিবলৈ বিছাৰে সেয়া হৈছে ‘হয় হুজুৰ’।