পঞ্চায়ত নিৰ্বাচনত ব্যাপক অনিয়ম হোৱাৰ অভিযোগ তুলি নদুৱাৰ আৰু ঢেকীয়াজুলি বিধানসভা সমষ্টিত নতুনকৈ পঞ্চায়ত নিৰ্বাচন অনুষ্ঠিত কৰাৰ দাবী কৰিছে শোণিতপুৰ জিলা কংগ্ৰেছে। জিলা কংগ্ৰেছৰ সভাপতি দাদুল কুমাৰ বৰকটকীৰ নেতৃত্বত যোৱা এটা প্ৰতিনিধি দলে আজি ৰাজ্যিক নিৰ্বাচনী আয়ুক্তক সাক্ষাৎ কৰি এক স্মাৰক পত্ৰ প্ৰদান কৰে। নদুৱাৰ বিধানসভা সমষ্টিত কংগ্ৰেছ দলৰ প্ৰাৰ্থীসকলক ভয়-ভাবুকি দি একাংশ গুণ্ডাই মনোনয়ন পত্ৰ দাখিল কৰিবলৈ নিদিয়াৰ সবিস্তাৰ তথ্য আৰু আৰক্ষীক দাখিল কৰা গোচৰ, জিলা আয়ুক্তক লিখিতভাৱে দিয়া অভিযোগৰ প্ৰতিলিপিসহ এক আবেদন দাখিল কৰে। এই আবেদনখনৰ জৰিয়তে নদুৱাৰ আৰু ঢেকীয়াজুলি সমষ্টিৰ ৰাইজক গণতান্ত্ৰিক অধিকাৰ সাব্যস্ত কৰাৰ সুযোগ দিয়াৰ দাবীত নতুনকৈ নিৰ্বাচনী প্ৰক্ৰিয়া উত্থাপন কৰাৰ দাবী উত্থাপন কৰে আৰু সমগ্ৰ বিষয়টো তদন্তৰ আওতালৈ আনিবলৈ আহ্বান জনায়। অসম প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰা, পঞ্চায়তীৰাজ বিভাগৰ অধ্যক্ষ হেমন্ত অধিকাৰী, মুখপাত্ৰ আনোৱাৰ হুছেইন লস্কৰ, ৰূপা কলিতা, শোণিতপুৰ জিলা কংগ্ৰেছৰ সম্পাদক ৰাজেশ পাণ্ডিয়াকে ধৰি একাংশ প্ৰতিনিধিয়ে আজি ৰাজ্যিক নিৰ্বাচনী আয়ুক্তৰ ওচৰত যুক্তিসহকাৰে নদুৱাৰ আৰু লখিমপুৰত পঞ্চায়ত নিৰ্বাচনী প্ৰক্ৰিয়া নতুনকৈ আৰম্ভ কৰিবৰ বাবে দাবী জনায়। আয়ুক্তজনে বিষয়টো পৰ্যালোচনা কৰা হ’ব বুলি জানিবলৈ দিয়ে।