আজি দিছপুৰ প্ৰেছ ক্লাৱত এখন গুৰুত্বপূর্ণ সংবাদমেল সম্বোধন কৰি সদৌ অসম গৰিয়া-মৰিয়া-দেশী জাতীয় পৰিষদৰ সভাপতি নুৰুল হকে ভাৰত চৰকাৰে লোৱা জাতিগত জনগণনাৰ সিদ্ধান্তক আদৰণি জনায়। তেওঁ কেন্দ্ৰীয় কেবিনেট আৰু প্ৰধানমন্ত্ৰী নৰেন্দ্ৰ মোদীক বিশেষ ধন্যবাদ জনাই কয়, “এই সিদ্ধান্ত অসমসহ দেশৰ সকলো খিলঞ্জীয়া জাতিৰ ক্ষেত্ৰত এক ঐতিহাসিক সুযোগ।”

নুৰুল হকে স্পষ্টভাৱে কয় —
“আমি সদৌ অসম গৰিয়া-মৰিয়া-দেশী জাতীয় পৰিষদৰ তৰফৰ পৰা এই সিদ্ধান্তক স্বাগতম জনাইছো। লগতে, অসম চৰকাৰে ঘোষণা কৰা খিলঞ্জীয়া ইছলাম ধৰ্মীয়সকলৰ স্বতন্ত্ৰ ৰূপত চিনাক্তকৰণ প্ৰক্ৰিয়া বাস্তৱায়িত কৰিবলৈ দাবী জনাইছো।”

তেওঁয়ে চৰকাৰক সতৰ্ক কৰি কয় —

“অসমত বিহাৰ, পূৰ্ববঙ্গ আৰু উত্তৰ প্ৰদেশৰ পৰা অহা প্ৰব্ৰজিত মুছলমানসকলে বহু সময়তে গৰিয়া, মৰিয়া, দেশী, জোলহা আদিৰ নাম ব্যৱহাৰ কৰে। এই ধৰণৰ স্বঘোষণাই খিলঞ্জীয়া ইছলাম ধৰ্মীয়সকলৰ অস্তিত্বক সংকটৰ মুখত পেলাব পাৰে।”

সেয়ে কেন্দ্ৰীয় আৰু ৰাজ্য চৰকাৰক —
👉 বিশেষ বিধিগত ব্যৱস্থা গ্ৰহণ,
👉 প্ৰত্যেক পিয়ল স্বঘোষণাৰ তথ্যৰ পুনৰ যাচাই,
👉 অযাচিত অন্তর্ভুক্তিৰ ৰোধৰ বাবে SOP নিৰ্ধাৰণ,
কৰিব লাগিব বুলি তেওঁ দাবী জনায়।

সংগঠনটোৱে উল্লেখ কৰে যে —
সঠিক, বৈজ্ঞানিক, আৰু দলিলভিত্তিক পিয়ল নথিভুক্তিৰে অসমত গৰিয়া, মৰিয়া, দেশী, জোলহা, মাইমল, পাংগাল আদি খিলঞ্জীয়া ইছলাম ধৰ্মীয়সকলৰ পৰিচয় ৰক্ষা কৰিব পাৰি।

নুৰুল হকে আৰু কয় —

“চৰকাৰে বহুদিন ধৰি আৰ্থ-সামাজিক জৰিপৰ প্ৰতিশ্ৰুতি দিলেও সেয়া এতিয়ালৈকে কাৰ্যৰূপ নিধান কৰা নাই। আমি এতিয়া দাবী কৰিছো — অসম চৰকাৰে কেন্দ্ৰীয় চৰকাৰৰ সৈতে সমন্বয় কৰি জাতিগত জনগণনাৰ বাবে SOP নিৰ্ধাৰণত মুখ্য ভূমিকা গ্ৰহণ কৰক।”

তেওঁ খিলঞ্জীয়া ইছলাম ধৰ্মীয়সকলক আহ্বান জনায় —

“এই জনগণনাত প্ৰতিজনে সচেতনতাৰে নিজৰ জনগোষ্ঠীয় পৰিচয় ঘোষণা কৰক। এইটো কেৱল পৰিচয়ৰ কথা নহয়, আমাৰ অধিকাৰৰ প্ৰশ্ন।”

সংগঠনটোৰ মতে —
ভাৰতৰ স্বাধীনতাৰ পিছত প্ৰথমবাৰৰ বাবে অনুষ্ঠিত হ’বলগীয়া জাতিগত জনগণনাই অসমত বঞ্চিত, শোষিত, খিলঞ্জীয়া ইছলাম ধৰ্মীয়সকলৰ আত্মনিয়ন্ত্ৰণৰ অধিকাৰ সাব্যস্ত কৰাৰ দিশত এক ঐতিহাসিক পদক্ষেপ হ’ব।