গুৱাহাটীঃ ‘২০২৬ৰ বিধানসভা নিৰ্বাচনত অসমত আমি এখন অহংকাৰমুক্ত চৰকাৰ গঢ়িম।’ – এই দাবী কংগ্ৰেছ সাংসদ গৌৰৱ গগৈৰ। মুখ্যমন্ত্ৰী হিমন্ত বিশ্ব শৰ্মাই গাদী হেৰুওৱাৰ ভয়ত শংকিত হৈ পৰিছে বুলি মন্তব্য কৰি গৌৰৱ গগৈয়ে কয় যে, ইয়াৰ বাবেই মুখ্যমন্ত্ৰীয়ে কংগ্ৰেছৰ মাজত বিভাজন আনিব চেষ্টা কৰিছে।

উল্লেখ্য যে, শেহতীয়াকৈ কংগ্ৰেছৰ কেইবাগৰাকীও বিধায়কে অসম প্ৰদেশ কংগ্ৰেছ কমিটীৰ সভাপতিৰ পদৰ পৰা ভূপেন বৰাক অপসাৰণৰ বাবে স্বাক্ষৰ অভিযান চলোৱাৰ চৰ্চা চলিছে। একাংশ সংবাদ মাধ্যমৰ বাতৰি অনুসৰি, কংগ্ৰেছৰ ২০ জনতকৈও অধিক বিধায়কে গৌৰৱ গগৈক প্ৰদেশ কংগ্ৰেছৰ সভাপতিৰ দায়িত্ব অৰ্পণৰ হকে ইতিমধ্যে কেন্দ্ৰীয় নেতৃত্বলৈ পত্ৰ প্ৰেৰণ কৰিছে।

এই প্ৰংসগতে আজি সংবাদ মাধ্যমৰ সৈতে বাৰ্তালাপ কৰি যোৰহাট সংসদীয় সমষ্টিৰ সাংসদ গৌৰৱ গগৈয়ে কংগ্ৰেছক বিভাজিত কৰিবলৈ এয়া মুখ্যমন্ত্ৰী হিমন্ত বিশ্ব শৰ্মাৰ ষড়যন্ত্ৰ বুলি অভিহিত কৰে।

গৌৰৱ গগৈয়ে কয়, ”ভূপেন বৰা ডাঙৰীয়াই কৈছে যে অসমত কংগ্ৰেছ চৰকাৰ আহিলেই হিমন্ত বিশ্ব শৰ্মাৰ বিৰুদ্ধে এছ আই টি গঠন কৰা হ’ব। এছ আই টি গঠন কৰিলে হিমন্ত বিশ্ব শৰ্মাৰ সম্পত্তিৰো তদন্ত হ’ব। গাদী হেৰুওৱাৰ লগতে সম্পত্তিৰ তদন্ত হোৱাৰ আশংকাতে এতিয়া তেওঁ আমাৰ মাজত বিভাজন আনিবলৈ চেষ্টা কৰিছে।’’

আজি অসমৰ ৰাইজৰ মানুহে হিমন্ত বিশ্ব শৰ্মাৰ ৰাজনীতি বুজি উঠিছে বুলি মন্তব্য কৰি সাংসদগৰাকীয়ে কয় যে যোৱা লোকসভা নিৰ্বাচনত যিদৰে দেশৰ জনতাই প্ৰধানমন্ত্ৰী নৰেন্দ্ৰ মোদীৰ মগংলসূত্ৰ আৰু কংগ্ৰেছৰ মেনিফেষ্ট’ৰ ৰাজনীতি নসাৎ কৰিছিল, সেইদৰে অহা বিধানসভা নিৰ্বাচনত হিমন্ত বিশ্ব শৰ্মাৰ হিন্দু-মুছলমানৰ ৰাজনীতিও নসাৎ কৰিব।

বিজেপিৰ হিন্দু-মুছলমানৰ ৰাজনীতি বিফল কৰি অহা বিধানসভা নিৰ্বাচনত কংগ্ৰেছে এখন অহংকাৰমুক্ত চৰকাৰ গঠন কৰিব বুলিও দৃঢ়তাৰে মন্তব্য কৰে সাংসদ গৌৰৱ গগৈয়ে।