গুৱাহাটীঃ প্ৰাক্তন সাংসদ, প্ৰাক্তন প্ৰদেশ কংগ্ৰেছৰ সভাপতি তথা টিএমচিৰ সভাপতি ৰিপুন বৰাই টিএমচি ত্যাগ কৰাৰ পাছতে তেওঁ ক’ত যোগদান কৰিব তাকে লৈ চৰ্চা অব্যাহত আছে৷ ২০২২ চনৰ এপ্ৰিল মাহত অল ইণ্ডিয়া তৃণমূল কংগ্ৰেছত যোগদান কৰিছিল ৰিপুৰ বৰাই৷ প্ৰায় আঢ়ৈ বছৰ দলটোৰ ৰাজ্যিক মুৰব্বী পদত থাকি অৱশেষত ছত্ৰভংগ দিছে৷ দেওবাৰে বৰাই দলটোৰ নেতাৰ বিৰুদ্ধে বিষোদগাৰ প্ৰকাশ কৰি পদত্যাগ ঘোষণা কৰে যদিও এই পৰ্যন্ত পৰৱৰ্তী ৰাজনৈতিক যাত্ৰা কোনটো দলৰ সৈতে কৰিব তাকে লৈ চৰ্চা চলিছে৷ ৰিপুন বৰাই কংগ্ৰেছত পুনৰ যোগদান কৰাৰ চৰ্চা চলিছে৷

পৰৱৰ্তী সময়ত কোনটো দলত যোগদান কৰিব সেই সন্দৰ্ভত সাংবাদিকে সোধা এক প্ৰশ্নত বৰাই কয় যে যেতিয়া মই তৃণমূল কংগ্ৰেছত যোগদান কৰিছিলো তেতিয়া মোৰ বহু আশা আছিল। মই টিএমচিত যোগদান কৰিবলৈ কংগ্ৰেছ এৰিছিলো৷ বংগত বিজেপিক ক্ষমতা দখল কৰাত বাধা দিয়াত মমতা বেনাৰ্জীৰ সফলতাৰ দ্বাৰা অনুপ্ৰাণিত হৈছিলো৷ অৱশ্যে, তৃণমূলৰ সৈতে দুবছৰ থকাৰ পিছত বৰাই অনুভৱ কৰিছিল যে দলটো অসমত বিস্তাৰ কৰাত অসুবিধা আছে৷ অসমৰ মানুহে দলটোক বংগৰ আঞ্চলিক দল বুলি ভাবে৷ তেওঁ লগতে কয় যে মই যিহেতু কংগ্ৰেছত আছিলো৷ সেয়েহে কংগ্ৰেছে বিচাৰিলে মই দলটোলৈ যোৱাত অসুবিধা নাই৷ কিয়নো কংগ্ৰেছ মোৰ পুৰণি ঘৰ আৰু মই ঘূৰি যাবলৈ ভাল পাম৷