Brahmaputra Times
সোমবাৰে বৰপেটাৰ পৰা অবৈধ পুৰুষ-মহিলাকে ধৰি মুঠ ২৮ জন লোকক বিদেশী বুলি ঘোষণা কৰি গোৱালপাৰাৰ ডিটেনচন কেম্পলৈ প্ৰেৰণ কৰা সন্দৰ্ভত প্ৰতিক্ৰিয়া প্ৰকাশ কৰিছে এ আই ইউ ডি এফ দলে।
দলটোৰ দুই বিধায়ক ক্ৰমে নজৰুল হক আৰু ৰফিকুল ইছলামে এই সন্দৰ্ভত চৰকাৰৰ লগতে কংগ্ৰেছক সমালোচনা কৰি ডিটেনচন কেম্পলৈ প্ৰেৰণ কৰা ২৮জনৰ হৈ আইনী যুঁজ দিব বুলিও মন্তব্য কৰে।
তেওঁলোকে কয়, ‘২৮জন লোকৰ সমস্ত তথ্য আহৰণ কৰাৰ বাবে সাজু হৈছে আজমল’। প্ৰয়োজনত উচ্চতম ন্যায়ালয়ৰ দ্বাৰস্থ হ’বলৈ মৌলানা বদৰুদ্দিন আজমল সাজু বুলিও উল্লেখ কৰে।
সোমবাৰে ২৮জন লোকক ডিটেনচন কেম্পলৈ প্ৰেৰণ কৰাৰ মুহূৰ্তত অঞ্চলটোত তীব্ৰ উত্তেজনাৰ সৃষ্টি হোৱাৰ লগতে বিভিন্ন দল-সংগঠনে প্ৰতিবাদ সাব্যস্ত কৰিছিল।
এই বিষয়টোক লৈ চলি থকা বিতৰ্কৰ মাজতেই আজি এ আই ইউ ডি এফ দলে কৰা এই ঘোষণাই স্বাভাৱিকতে পৰিয়াল কেইটাক কিছু সকাহ প্ৰদান কৰিব।
