Brahmaputra Times
বৃহস্পতিবাৰে নিশা চুইজাৰলেণ্ডৰ সংবাদ মাধ্যমৰ বাতৰিৰ উদ্ধৃতি দি আমেৰিকাৰ ইকুইটি প্ৰতিষ্ঠান হিণ্ডেনবাৰ্গ ৰিচাৰ্চে দাবী কৰে যে আদানী গোষ্ঠীৰ সৈতে জড়িত ৩১ কোটি ডলাৰ (প্ৰায় ২৬০০ কোটি টকা) জব্দ কৰা হৈছে।
দেশখনৰ কৰ্তৃপক্ষই ছুইজাৰলেণ্ডৰ ছটা বেংকৰ বিভিন্ন একাউণ্টত এই ধন জব্দ কৰে। ইয়াৰ পিছতে আজি (শুকুৰবাৰে) শ্বেয়াৰ বজাৰত ইয়াৰ কোনো প্ৰভাৱ পৰিছে নেকি সেই বিষয়ে সংশ্লিষ্ট মহলে অপেক্ষা কৰিছে।
সংবাদ মাধ্যমৰ বাতৰি অনুসৰি ২০২১ চনত অবৈধ শ্বেয়াৰ আৰু ধনৰ লেনদেনৰ সৈতে জড়িত তদন্তৰ পিছত চুইজাৰলেণ্ড কৰ্তৃপক্ষৰ তৰফৰ পৰা এই পদক্ষেপ লোৱা হৈছে।
অভিযোগ অনুসৰি গৌতম আদানীৰ উদ্যোগ গোষ্ঠীৰ সৈতে জড়িত এজন ব্যক্তিয়ে ব্ৰিটিছ ভাৰ্জিন দ্বীপপুঞ্জ, মৰিচাছ আৰু বাৰ্মুডাৰ বিত্তীয় প্ৰতিষ্ঠানসমূহত ধন জমা কৰিছিল। সেই কোম্পানীবোৰে প্ৰায় সমগ্ৰ ধন আদানী গ্ৰুপৰ কোম্পানীত বিনিয়োগ কৰিছিল। সেই ব্যক্তিজনৰ একাউণ্ট জব্দ কৰা হৈছে।
