২৬ হাজাৰ কোটি পানীত পৰিল আদানীৰ

৬টা বেংক একাউণ্টসহ সমুদায় টকা জব্দ কৰিলে ছুইছ বেংকে

৩১০ মিলিয়ন ডলাৰসহ ছুইছ বেংকে জব্দ কৰিলে গৌতম আদানীৰ কেইবাটাও বেংক একাউণ্ট। ছুইজাৰলেণ্ডৰ সংবাদ প্ৰতিষ্ঠান গথাম চিটিৰ উদ্ধৃতি প্ৰদান কৰি এই তথ্য প্ৰকাশ কৰিছে আমেৰিকাৰ হিণ্ডেনবাৰ্গ নামৰ ৰিছাৰ্ছ প্ৰতিষ্ঠানটোৱে। প্ৰতিবেদন অনুসৰি, আদানী গোষ্ঠীৰ সৈতে সম্পৰ্কিত কেইবাটাও বেংক একাউণ্ট জব্দ কৰা হৈছে। এই বেংক একাউণ্ট কেইটাত জমা থকা ধনৰ পৰিমাণ আছিল ৩১০ মিলিয়ন ডলাৰ। ভাৰতীয় মুদ্ৰাৰ হিচাপত এই ধনৰ পৰিমাণ ২৬০০০ কোটি টকা।

এই বিশাল ধনৰাশি ছুইজাৰলেণ্ডৰ মুঠ ৬ টা বেংক একাউণ্টত জমা আছিল বুলিও দাবী কৰিছে হিণ্ডেনবাৰ্গে।কিন্তু ইয়াৰ বিপৰীতে আদানী গ্ৰুপে জনাইছে ছুইছজাৰলেণ্ডৰ কোনো বেংকত তেওঁলোকৰ প্ৰতিষ্ঠানৰ একাউণ্ট নাই। হিণ্ডেনবাৰ্গে যি প্ৰতিবেদন প্ৰকাশ কৰিছে সেয়া অসত্য আৰু উদ্দেশ্যপ্ৰণোদিত বুলিও দাবী আদানী গ্ৰুপৰ।

হিণ্ডেনবাৰ্গৰ প্ৰতিবেদন অনুসৰি, ২০২১ চনত বেআইনীভাৱে শ্বেয়াৰ আৰু অৰ্থনৈতিক লেনেদেন সংক্ৰান্তীয় এক গোচৰ ৰুজু হৈছিল। এই গোচৰৰ তদন্তৰ পাছতেই এই পদক্ষেপ গ্ৰহণ কৰিছে ছুইজাৰলেণ্ডৰ সংশ্লিষ্ট কৰ্তৃপক্ষই। অভিযোগ উঠিছিল গৌতম আদানীৰ মালিকানাধীন কোম্পানীৰ সৈতে জড়িত এগৰাকী নাগৰিকে ব্ৰিটিছ ভাৰ্জিন আইলেণ্ডছ, মৰিছাচ আৰু বাৰমুডাৰ বিত্তীয় প্ৰতিষ্ঠানত পুঁজি বিনিয়োগ কৰিছিল। সেই কোম্পানীসমূহে আকৌ আদানী গ্ৰুপত সম্পূৰ্ণ পুঁজি বিনিয়োগ কৰিছিল। সেয়ে সেই ব্যক্তিজনৰ একাউণ্ট ফ্ৰীজ কৰাৰ লগতে আদানী গ্ৰুপৰ মুঠ ৬ টা একাউণ্ট ফ্ৰীজ কৰি তাৰ ধন বাজেয়াপ্ত কৰিছে বুলি দাবী কৰিছে হিণ্ডেনবাৰ্গে।