জম্মু-কাশ্মীৰ বিধানসভা নিৰ্বাচনৰ বাবে ৰাজনৈতিক দলসমূহে তীব্ৰতৰ কৰি তুলিছে প্ৰচাৰ অভিযান। সোমবাৰে গৃহমন্ত্ৰী অমিত শ্বাহে ৰামবনত উপস্থিত হৈ এক বিশাল জনসভাত অংশ লৈ ভোটাৰক সম্বোধন কৰে।

কেন্দ্ৰীয় গৃহমন্ত্ৰী অমিত শ্বাহে কয়, ‘৩৭০ অনুচ্ছেদ পুনৰ কাৰ্যকৰী কৰি তেওঁলোকে জম্মু-কাশ্মীৰক সন্ত্ৰাসবাদৰ জুইত পেলাব বিচাৰে। পাকিস্তানৰ সৈতে আলোচনাৰ কথা কয় মই এই কথা স্পষ্ট কৰি দিওঁ যে সন্ত্ৰাসবাদ শেষ নোহোৱালৈকে পাকিস্তানৰ সৈতে কোনো আলোচনা নহ’ব’।

অমিত শ্বাহে লগতে কয়, ‘তেওঁলোকে এল অ’ চি বাণিজ্য পুনৰ আৰম্ভ কৰিব বিচাৰে, সেই একেটা এল অ’ চি ব্যৱসায় যিয়ে ইয়াত সন্ত্ৰাসবাদক লালন-পালন কৰিছে। সন্ত্ৰাসবাদ শেষ নোহোৱালৈকে বাণিজ্য আৰম্ভ নহ’ব’।

অমিত শ্বাহে পুনৰ কয়, ‘ওমৰ আব্দুল্লাই কয় আফজল গুৰুক ফাঁচী দিব নালাগে। ইয়াৰ পৰাই বুজা যায় ৰাহুল গান্ধী আৰু ওমৰ আব্দুল্লাৰ চৰকাৰ গঠন হ’লে কি হ’ব? পুনৰ গুলীচালনা হ’ব, পুনৰ শিলগুটি নিক্ষেপ কৰা হ’ব। ইয়াত পুনৰ চিনেমা হল বন্ধ কৰা হ’ব, অমৰনাথ যাত্ৰাত পুনৰ আক্ৰমণ কৰা হ’ব’।