গুৱাহাটী মহানগৰীৰ লগতে ৰাজ্যজুৰি হোৱা প্ৰতিক্ৰিয়া পাছত দীঘলীপুখুৰী পাৰৰ গছসমূহ ৰক্ষা কৰাৰ সিদ্ধান্ত গ্ৰহণ কৰিছে অসম চৰকাৰে। মুখ্যমন্ত্ৰী হিমন্ত বিশ্ব শৰ্মাৰ নিৰ্দেশ অনুসৰি ৰাজ্যৰ মুখ্য সচিব ড০ ৰবি কোটাই বুধবাৰে লোক নিৰ্মাণ বিভাগ (পথ) ৰ এক গুৰুত্বপূৰ্ণ বৈঠকত অংশগ্ৰহণ কৰে।

এই বৈঠকত নিৰ্মীয়মাণ গোপীনাথ বৰদলৈ উৰণ সেতুৰ পশ্চিম আৰু পূব দীঘলীপুখুৰী পথ পৰিহাৰ কৰাৰ বাবে সাম্ভাব্য বিকল্পৰ বিষয়ে বিভাগীয় জ্যেষ্ঠ বিষয়াসকলৰ সৈতে আলোচনা কৰা হয়।দীঘলীপুখুৰী পাৰৰ শতায়ুগৰকা গছসমূহ ৰক্ষাৰ স্বাৰ্থত হোৱা প্ৰতিবাদ, প্ৰতিক্ৰিয়াৰ পৰিপ্ৰেক্ষিততে এই আলোচনা অনুষ্ঠিত হয়।

আলোচনাৰ অন্তত দীঘলীপুখুৰী অঞ্চলৰ ঐতিহ্যবাহী গছ কটা পৰিহাৰ কৰিবলৈ আৰু জি এন বি পথ অথবা অন্য বিকল্প পথত উৰণ সেতুৰ শেষাংশ হোৱাটো নিশ্চিত কৰিবলৈ বাহন অহা-যোৱাৰ খচৰা প্ৰস্তুত কৰিবলৈ নিৰ্দেশনা জাৰি কৰা হৈছে। লোক নিৰ্মাণ বিভাগে অহা এসপ্তাহৰ ভিতৰত নতুনকৈ প্ৰস্তাৱিত পদ্ধতিৰ সৈতে এসপ্তাহৰ ভিতৰত তেওঁলোকৰ প্ৰতিবেদন দাখিল কৰিব।