Brahmaputra Times
উৰণ সেতু নিৰ্মাণে হওঁক বা পথ বহলোৱাৰ কাৰণে হওঁক বিগত ৩ বছৰত গুৱাহাটীত প্রায় ৩ হাজাৰ জোপা গছ কটা হৈছে । বন বিভাগ আৰু ৰাষ্ট্ৰীয় ঘাইপথ প্ৰাধিকৰণৰ পৰা পোৱা তথ্য অনুসৰি, জালুকবাৰীৰ পৰা খানাপাৰালৈ চাৰিলেনৰ ৰাষ্ট্ৰীয় ঘাইপথটো ছয়লেন কৰিবলৈ ১৬.৫ কিলোমিটাৰ দৈৰ্ঘৰ এই পথছোৱাত ২০২২ চনত প্রায় ২,৫০০ জোপা বিভিন্ন ধৰণৰ গছ কাটি তহিলং কৰিছিল চৰকাৰে ।
মহানগৰীৰ নিকটৱৰ্তী পলাশবাৰীতো পূৱ কামৰূপ বন সংমণ্ডলৰ অধীনত পথ বহলোৱাৰ নামত ২৫৪ জোপা গছ কটা হৈছিল ।একেদৰে ধাৰাপুৰৰ পৰা বিমানবন্দৰৰ দিশে পথ বহলোৱাৰ নামতো বহু পুৰণি গছ কাটি পেলোৱা হ’ল। তদুপৰি চলিত বৰ্ষতে ৰুক্মিণী গাঁৱত উৰণ সেতু নিৰ্মাণৰ নামত কেইবাডালো পুৰণি গছ কাটি পেলোৱা হৈছে।
বিভাগীয় সূত্রৰ তথ্য অনুসৰি, ২০২২ চনত জু-ৰোডৰ কমাৰ্চ পইণ্টৰ পৰা সুন্দৰপুৰলৈ নিৰ্মিত শ্ৰদ্ধাঞ্জলি উৰণ সেতুৰ নামতো লোকনির্মাণ বিভাগৰ অনুৰোধত বন বিভাগে ১৫ জোপা পুৰণি গছ কাটিছিল ।
আনহাতে, অসম সচিবালয়ৰ সন্মুখৰ পৰা আৰম্ভ হোৱা উৰণ সেতুৰ নামত চৰকাৰে ৫৪ জোপা, ফাঁচীবজাৰৰ ফুট অভাৰব্ৰীজৰ নামত ৯ জোপা, খানাপাৰাৰ ফুট অভাৰব্ৰীজৰ নামত ৬ জোপা পুৰণি গছ কাটিছিল চৰকাৰে। এবছৰ পূৰ্বে নাৰেংগী তিনিআলিৰ পৰা বোন্দালৈ ৰাস্তা বহলোৱাৰ নামত ৭৩ জোপা, গুৱাহাটী শোধনাগাৰৰ সমীপৰ পথৰ পথ বহলোৱাৰ নামত ৩০ জোপা গছ কাটিছিল ।
শেহতীয়াকৈ উৰণ সেতু নিৰ্মাণৰ নামত দীঘলীপুখুৰীৰ পাৰত ২১ জোপা আৰু ভৰলুমুখত ৭৪ জোপা পুৰণি গছ কাটিবলৈ সিদ্ধান্ত লৈ দীঘলীপুখুৰীৰ লোকনির্মাণ বিভাগে গছত কাটিবলৈ বিচৰাৰ চিহ্ন লগাইছিল। লগে লগে প্ৰতিবাদত নামি পৰিল সৰ্ব সাধাৰণ।
মহানগৰীৰ গছ কটা সন্দৰ্ভত আছুৰ মুখ্য উপদেষ্টা ড৹ সমুজ্জ্বল কুমাৰ ভট্টাচাৰ্যই কয়- “গুৱাহাটী মহানগৰীৰ দীঘলীপুখুৰীৰ পাৰৰে নহয়, গুৱাহাটীৰ কোনো স্থানৰে গছ কাটিব নোৱাৰিব চৰকাৰে। উন্নয়ন আমাক লাগিব কিন্তু গুৱাহাটীৰ ঐতিহ্যৰ লগত হেতালি খেলিব নোৱাৰিব বুলি দোহোৰাই ভট্টাচাৰ্যই।
