মৰিগাওঁঃ জাতীয়তাবাদৰ বচন আওৰাই সমাজ সংস্কাৰৰ ভাওনা কৰি অহা মৰিগাৱৰ এজন যুৱকক কালি আৰক্ষীয়ে চাকৰি দিনাৰ নামত ধন সংগ্ৰহৰ দালালিৰ অভিযোগত আটক কৰা ঘটনাই ব্যাপক চৰ্চা লাভ কৰিছে।জাতীয়তাবাদীৰ বচন আওৰোৱাৰ লগতে সামাজিক মাধ্যমত এটি সংবাদ চেনেল খুলি সাংবাদিকৰো আখৰা কৰি অহা এই যুৱক জন হৈছে মৰিগাওঁ চহৰৰ নিবাসী সপোণ অসম ওৰফে সপোণ দাস।প্ৰাপ্ত তথ্য মতে,কালি অনুষ্ঠিত হৈ যোৱা ADRE পৰীক্ষাত ধনৰ বিনিময়ত ভাল ফলাফল লাভৰ আশা দি এটি দালাল চক্ৰই বিগত সময়ত ধন সংগ্ৰহৰ প্ৰচেষ্টা অব্যাহত ৰাখিছিল।কিন্তু ৰাজ্যৰ লাখ লাখ নিৱনুৱা যুৱক যুৱতীৰ সপোণক হৈ খেলা কৰা এই চক্ৰটোৰ বিষয়ে আৰক্ষীয়ে খবৰ লাভ কৰে।বিশেষ খবৰৰ ভিত্তিত কাৰ্বি আংলং আৰক্ষীয়ে পৰহি নিশা এই চক্ৰৰে জড়িত এজন লোকক আটক কৰে।উক্ত লোকজনৰ স্বীকাৰোক্তিৰ ভিত্তিত এই অসৎ চক্ৰৰে জড়িতৰ অভিযোগত আৰক্ষীয়ে শেহতীয়াকৈ সপোণ দাসক আটক কৰে।উল্লেখ্য যে,”বীৰ লাচিত সেনা” নামৰ সংগঠনটিৰ সৈতেয়ো পূৰ্বতে জড়িত থকা সপোণ দাস নামৰ যুৱক জনে শেহতীয়াকৈ “অসমৰ সকলো জিলাত মিঞাৰ মাছ বিক্ৰী কৰাটো বন্ধ কৰা হব।অসমত খিলঞ্জীয়া লোকে মাছ পালন কৰিব” বুলিয়ো হুংকাৰ প্ৰদান কৰিছিল।