ৰঙিয়াত বিজেপি মিত্ৰজোঁটৰ অন্যতম সহযোগী দল অসম গণ পৰিষদৰ সম্পাদক তথা মুখপাত্ৰ অৰ্ণৱ ভৰালীয়ে স্মাৰ্ট মিটাৰ আৰু হিন্দু-মুছলমানৰ প্ৰসংগক লৈ সংবাদ মাধ্যমৰ আগত গৰজি উঠা দেখা যায়।

অগপ নেতাগৰাকীয়ে সংবাদ মাধ্যমৰ আগত কয়, ‘স্মাৰ্ট মিটাৰ প্ৰসংগত বাৰুকৈয়ে জুৰুলা হৈ পৰিছো। ৰাইজ অধিকভাৱে জুৰুলা হৈ পৰিছে। চৰকাৰে অতি শীঘ্ৰে স্মাৰ্ট মিটাৰ সন্দৰ্ভত ব্যৱস্থা গ্ৰহণ কৰক। নহ’লে ৰাইজে যথেষ্ট বেয়া পাব। আমিও স্মাৰ্ট মিটাৰক লৈ জুৰুলা হৈ পৰিছো। ইয়াত ৰাজনৈতিক দলৰ কথা নাহে।’

সাম্প্ৰতিক সময়ত ৰাজ্যৰ ৰাজনৈতিক তথা সামাজিকভাৱে চৰ্চিত হৈ থকা মিঞা তথা হিন্দু-মুছলমান সন্দৰ্ভতো নিজৰ প্ৰতিক্ৰিয়া প্ৰকাশ কৰে।

এই সন্দৰ্ভত তেওঁ কয়, ‘হিন্দু-মুছলমানক লৈ অসম গণ পৰিষদ দলে ৰাজনীতি কৰা নাই আৰু নকৰে। মোৰ পেটত ভাত নাই, এই সময়ছোৱাত হিন্দু-মুছলমানৰ কথা ভাবি ভাগ ভাগ কৰিবলৈ মোৰ সময়ো নাই আৰু নকৰো। হিন্দু মুছলমান প্ৰসংগ ভাবিবলৈ অগপ দলৰ সেইটো মানসিকতাই নাই। হিন্দু-মুছলমানক লৈ কেতিয়াও ভাগ-ভাগ কৰা নাই আৰু নকৰো।

যিটো সময়ত মানুহৰ পেটত ভাত নাই সেইটো সময়ত হিন্দু-মুছলমানৰ কথা ভাবিবলৈ কাৰো আহৰি নাই বুলিও মন্তব্য কৰে অগপ নেতা অৰ্ণৱ ভৰালীয়ে।