ঐতিহাসিক জেৰাই গাঁৱত অসম গণ পৰিষদৰ ৪০ সংখ্যক কেন্দ্ৰীয় প্ৰতিষ্ঠা দিৱস পালনৰ প্ৰস্তুতি পূৰ্ণ গতিত চলিছে৷ আজি পুনৰ প্ৰস্তুতিৰ বুজ ল’লে স্থানীয় বিধায়ক পোনাকণ বৰুৱাই৷ আঞ্চলিকতাবাদী দলৰ উত্থানত চাবুৱাৰ জেৰাই গাঁৱৰ বিশেষ ভূমিকাৰ কথা দোহাৰি ১৪ অক্টোবৰত এদিনীয়া কাৰ্যসূচীৰে আড়ম্বৰপূৰ্ণভাৱে অসম গণ পৰিষদ দলৰ প্ৰতিষ্ঠা দিৱস জেৰাইত পালনৰ সিদ্ধান্ত লোৱা বুলি কয় বিধায়ক বৰুৱাই৷ কেন্দ্ৰীয় প্ৰতিষ্ঠা দিৱসৰ অভ্যৰ্থনা সমিতিৰ বিষয়-ববীয়াৰ সৈতে বিভিন্ন দিশ আলোচনা কৰে৷ চাবুৱাবাসী আৰু জেৰাই গাঁওবাসীয়ে প্ৰতিষ্ঠা দিৱস সফল কৰিবলৈ অশেষ কষ্ট কৰাত ধন্যবাদ জ্ঞাপন কৰে বৰুৱাই৷ চাবুৱা সমষ্টিৰ বিধায়ক পোনাকণ বৰুৱাই জনোৱা মতে, ১৪ আগষ্টৰ পুৱা ৫ বজাত প্ৰভাতী, ৯ বজাত পতাকা উত্তোলন, ৯:৩০ বজাত শ্বহীদ তৰ্পণ, ১০ বজাত সতীৰ্থ সোঁৱৰণ, ১১ বজাত সাস্কৃতিক শোভাযাত্ৰা, দিনৰ ১২ বজাত মুকলি সভা, সন্ধা ৫ বজাত বন্তি প্ৰজ্বলন। প্ৰতিষ্ঠা দিৱসৰ অনুষ্ঠানত অসম গণ পৰিষদ দলৰ সভাপতি অতুল বৰুৱা, কাৰ্যকৰী সভাপতি কেশৱ মহন্তৰ লগতে কেন্দ্ৰীয় নেতৃত্ব উপস্থিত থাকিব। অভ্যৰ্থনা সমিতিৰ নেতৃত্বৰ সৈতে জেৰাইত এখন সংবাদমেল সম্বোধন কৰি বিধায়ক বৰুৱাই দলটোৰ ইতিহাস বৰ্ণনা কৰে৷ তেওঁ কয় যে অগপই দুবাৰকৈ দিছপুৰত অকলে চৰকাৰ গঠন কৰিছে৷ ২০১৬ চনৰ পৰা বিজেপিৰ সৈতে চৰকাৰ চলাই আছো৷ অগপ এটা সাধাৰণ দল নহয়৷ ছয় বছৰীয়া অসম আন্দোলনৰ ফলশ্ৰুতিত এই দলৰ জন্ম৷ সেই সময়ত অসম চৰকাৰৰ আমোলত পুলিচ-চিআৰপিএফৰ গুলীত ৮৫৫ জন লোক শ্বহীদ হৈছিল৷ খিলঞ্জীয়া লোক শ্বহীদ হৈছিল৷ হাজাৰ হাজাৰ লোক ঘূণীয়া হৈছিল৷ বাই-ভনী নিৰ্যাতিতা হৈছিল৷ অগপ ১৯৮৫ চনৰ প্ৰতিষ্ঠা হোৱাত পাছতে আজি উত্থান-পতনৰ সাক্ষী হৈছে৷ দলটো আজি প্ৰাপ্তবয়স্ক হৈছে বুলি উল্লেখ কৰি বিধায়ক পোনাকণ বৰুৱাই কয় ‘‘বিশ্ববিদ্যালয়ৰ ছাত্ৰই নেতৃত্ব লোৱা আজি দলটো প্ৰাপ্তবয়স্ক হৈছে৷ ছাত্ৰ অৱস্থাতে চৰকাৰৰ নেতৃত্ব লোৱাত কিছু ভুল ভ্ৰান্তি হৈছিল৷ কিন্তু প্ৰফুল্ল কুমাৰ মহন্তৰ প্ৰতি ৰাইজৰ সমৰ্থন আছিল৷ মানুহৰ আশা-প্ৰত্যাশা সীমাহীন আছিল৷ কিন্তু ৰাইজক আশ্বাস আৰু বিশ্বাসত লৈ চলিবলৈ প্ৰয়াস কৰিছিল৷ আজিও দলটোৱে ৰাইজৰ হকে কাম কৰি গৈছে৷ আজি আমি ৪০ বছৰত ভৰি দিলো৷ এইবাৰ জেৰাইত আমাৰ কেন্দ্ৰীয় দিৱস পালন কৰিছো৷ কিয়নো জেৰাই হৈছে আঞ্চলিক ৰাজনীতিৰ পীঠস্থান৷ জেৰাইৰ পৰাই আঞ্চলিক ৰাজনীতি আৰম্ভ হৈছিল৷ আমি আকৌ জেৰাইৰ পৰাই এই যাত্ৰা আৰম্ভ কৰিম৷ জেৰাইৰ পৰা আঞ্চলিক দলৰ উত্থান হ’ব৷’’