ডিজিটেল সংবাদ,  গুৱাহাটী: দীৰ্ঘদিনীয়া বিসম্বাদৰ অন্ত পেলাই অৱশেষত বিজেপি এৰি কংগ্ৰেছত যোগদানৰ বাবে সাজু হৈছে নলবাৰী বিধানসভা সমষ্টিৰ প্ৰাক্তন বিধায়ক অশোক শৰ্মাই। আজি বিজেপিৰ পৰা পদত্যাগ কৰাৰ পিছত অহা ৯ আগষ্টত তেওঁ আনুষ্ঠানিকভাৱে কংগ্ৰেছত যোগদান কৰিব বুলি জানিব পৰা গৈছে।

উল্লেখ্য যে বিগত দীৰ্ঘ সময়ৰ পৰা মুখ্যমন্ত্ৰী হিমন্ত বিশ্ব শৰ্মা নেতৃত্বাধীন ন-বিজেপিৰ পৰা উপেক্ষিত হৈ অহাৰ অভিযোগ কৰি আহিছিল প্ৰাক্তন বিধায়ক অশোক শৰ্মাই। অসম বিজেপিৰ ভিতৰত বিসম্বাদৰ উকমুকনি উঠাৰ পিছত তেওঁ দল ত্যাগ কৰাৰ ঘোষণা কৰিছিল।

ইফালে অসমত বিজেপিৰ ভেটি স্থাপনৰ সময়ৰ পৰাই বিজেপিৰ সৈতে জড়িত হৈ থকা অশোক শৰ্মাই এতিয়া দল ত্যাগ কৰাৰ কাৰণ সন্দৰ্ভত কয়, “একাংশ নেতাৰ আচৰণ আৰু স্বেচ্ছাচাৰী মনোভাৱৰ বাবে দল ত্যাগ কৰিছোঁ। বিজেপিত এতিয়া আলফাৰ দৰে আচৰণ কৰা হৈছে।’’ তিনি বছৰ ধৰি দলত যন্ত্ৰণাময় জীৱন নিৰ্বাহ কৰাৰ অভিযোগ তুলি অশোক শৰ্মাই কয় যে বিজেপিত এতিয়া প্ৰমূল্যবোধৰ ৰাজনীতি নাই। হিন্দু-মুছলমানৰ ৰাজনীতি কৰাৰ বাবে ক্ষতি হ’ব বিজেপিৰ।

আনহাতে বিজেপিৰ পৰা আনুষ্ঠানিকভাৱে বিদায় লোৱাৰ পূৰ্বে শৰ্মাই বৃহস্পতিবাৰে কামাখ্যা আৰু উগ্রতাৰা মন্দিৰত পূজা-অৰ্চনা আগবঢ়ায়।

মন কৰিবলগীয়া যে, অশোক শৰ্মাৰ সমান্তৰালভাৱে আন এগৰাকী বিসম্বাদী বিজেপি নেতা তথা প্ৰাক্তন কেন্দ্ৰীয় মন্ত্ৰী ৰাজেন গোহাঁইয়েও বিজেপি ত্যাগ কৰাৰ যো-জা চলোৱা বুলি জানিব পৰা গৈছে। ইতিমধ্যে তেওঁ বুধবাৰে তিনিচুকীয়াত ন-পুৰণি বিজেপি নেতা-কৰ্মীৰ সৈতে মিলিত হৈ এই সন্দৰ্ভত আলোচনা কৰা বুলিও জানিব পৰা গৈছে।