Brahmaputra Times
ডিজিটেল সংবাদঃ পুনৰ ঋণ ল’ব অসম চৰকাৰে। হিতাধিকাৰী সৃষ্টিৰ বাবে ৰাজকোষৰ পৰা বছৰি হাজাৰ হাজাৰ কোটি টকা খৰচ কৰা ৰাজ্য চৰকাৰে আকৌ ৰিজাৰ্ভ বেংকৰ পৰা ল’ব ঋণ। বিত্তীয় পৰিস্থিতি যিয়েই নহওক কিয়, ৰাজ্য চৰকাৰখনে নির্বাচনমুখী আঁচনি পৰিহাৰ কৰা নাই । হিতাধিকাৰীৰ পৰিসৰ ক্ৰমাৎ বৃদ্ধি কৰি গৈছে । তাৰ বাবেই অহা ৮ অক্টোবৰত ৰাজ্য চৰকাৰে পুনৰ ৭৫০ কোটি টকাৰ ঋণ ল’ব । লক্ষণীয় বিষয় যে যোৱা ১ অক্টোবৰত ৰাজ্য চৰকাৰে ৭৫০ কোটি টকাৰ ঋণ লৈছিল ।
পুনৰ ঋণ লোৱাৰ পাচত কেৱল ৰিজাৰ্ভ বেংকৰ পৰা লোৱা মুঠ ঋণৰ পৰিমাণ হ’ব ১,৫৮,৭৫০ কোটি টকা । শেহতীয়াকৈ আগষ্ট মাহৰ ১ আৰু ২৭ তাৰিখে এক হাজাৰ কোটিকৈ আৰু ছেপ্টেম্বৰ মাহত এটা সপ্তাহতে অৰ্থাৎ ১৭ আৰু ২৪ তাৰিখে দুবাৰকৈ ঋণ লৈছে ৰাজ্য চৰকাৰে ।
ৰাজ্য পৰিচালনাৰ বাবে বিত্ত বিভাগে লোৱা ঋণৰ পৰিমাণ ১,৫৮,৭৫০ কোটি টকালৈ বৃদ্ধি হোৱাৰ বিপৰীতে হিতাধিকাৰী সৃষ্টি কৰি ৭ খন আঁচনিৰ বাবদ বছৰি ব্যয় কৰিব ১১,০৭৫ কোটি টকা । তদুপৰি, নগদ ধন আদায় দিয়া বিভিন্ন আঁচনিও আছে চৰকাৰখনৰ।মুঠতে পুনৰ ৰাজ্যবাসীৰ ওপৰত ঋণৰ বোজা জাপি দিব চৰকাৰে।
